चीनमा एक जनामा कोरोना संक्रमण देखिएपछि सहरका ४७ लाखमा परीक्षण गरिँदै

बेइजिङ- चीनको सिन्जियाङ प्रान्तमा एक जनामा काेराेना भाइरस संक्रमण देखिएपछि सरकारले एउटा सहरका पूरै मानिसमा परीक्षण गर्न लागेको छ।

चिनियाँ मुख्य भूभागमा विगत १० दिनयता पहिलोपटक कोरोना भाइरस संक्रमित फेला पारिएको हो।

कासगार शहरमा करिब ४७ लाख मानिसको परीक्षण र्गा लागिएको अधिकारीहरुले जनाएका छन्। 

सहरको बाहिरी भेगस्थित सफु काउन्टीस्थित एउटा गार्मेन्ट कारखानामा काम गर्ने एक महिलामा पहिलोपटक लक्षणविनाको संक्रमण देखिएको थियो।

सहरमा अहिलेसम्म लक्षण नदेखिएका १३८ संक्रमित फेला गरेका छन्।

संक्रमण दर घटाउन समग्रमा चीन सफल देखिएको छ। तर ससानो संख्यामा संक्रमण फैलिने क्रम जारी छ।

चिनियाँ सरकारी सञ्चारमाध्यमका अनुसार नियमित परीक्षणका क्रममा ती महिला संक्रमित रहेको फेला पारिएको हो।

कासगार सहरका विद्यालय बन्द गराइएका छन् र परीक्षणमा निगेटिभ रिपोर्ट नआएसम्म त्यहाँका बासिन्दालाई सहर छोड्ने अनुमति दिइएको छैन।

आइतबार अपराह्णसम्म कासगार सहरका २८ लाख मानिसको परीक्षण गरिएको छ र बाँकी मानिसको दुई दिनभित्र परीक्षण सकिने अधिकारीले बताएका छन्।

यसअघि अक्टोबर सुरुमा चिङदाओ सहरका सबै ९० लाख मानिसको परीक्षण गरिएको थियो। बीबीसी