पाकिस्तानको भिसा लिने लाइनमा भागदौड हुँदा अफगानिस्तानमा १५ जनाको मृत्यु

एजेन्सी- अफगानिस्तानमा पाकिस्तानका लागि भिसा (प्रवेशाज्ञा)  लिने लाइनमा लागेका व्यक्तिहरुबीच भागदौड हुँदा कम्तीमा १५ जनाको मृत्यु भएको छ।

पाकिस्तानी कन्सुलेटको कार्यालयबाहिर जम्मा भएका हजारौँ मानिसबीच हिजो भागदौड भएको र त्यसमा अरु थुप्रै व्यक्ति घाइते भएको पाकिस्तानी समाचारमाध्यम डनले जनाएको छ।

उसका अनुसार अफगानिस्तानको पूर्वी सहर जलालाबादमा यो घटना भएको हो। भिसाका लागि आवेदन दिन कन्सुलेट कार्यालयबाहिर  झन्डै तीन हजार मानिस जम्मा भएका थिए।

उनीहरुले भिसा आवेदनका लागि टोकन लिँदै गर्दा भागदौड मच्चिएको हो। एक प्रत्यक्षदर्शीका अनुसार अचानक भागदौड भएपछि अनियन्त्रित बनेको भीडमा थुप्रै मानिस लडेर च्यापिएका थिए।

फर्मुल्ला नाम गरेका एक व्यक्तिले भने, ‘म रातिदेखि नै लाइनमा लागेका थिएँ। केही व्यक्तिहरु आक्रोशित हुँदै आए र धक्का दिन थाले। हामीमध्ये केही व्यक्ति भुइँमा लडे।’

पूर्वी अफगानिस्तानको जलालाबाद सहरका काउन्सिल सदस्य सोहराब कादरीले घटनामा ११ महिलाको मृत्यु भएको र घाइते हुनेमा केही उच्च अधिकारीसमेत रहेको बताएका छन्।

जलालाबादका एक अधिकारीले पाकिस्तानका लागि भिसा आवेदन गर्नेको संख्या अनियन्त्रि रुपमा बढेको उल्लेख गरेका छन्।

पाकिस्तानी अधिकारीहरुले भिसा आवेदनका लागि भएको भीड नियन्त्रणका लागि अफगानिस्तान सरकारसँग आग्रह गरेका छन्।