आधा घण्टा ढिलो सुरु भयो प्रतिनिधिसभा बैठक, लगत्तै एमाले सांसदको नाराबाजी

काठमाडौं– तोकिएको समयभन्दा आधा घण्टा ढिलो सुरु भएको प्रतिनिधिसभा बैठक प्रमुख प्रतिपक्षी दल नेकपा (एमाले) ले अवरुद्ध गरेको छ।

सभामुखले बैठक सुरु भएको जनाउ दिनेबित्तिकै एमालेका सांसदहरुले बेल घेराउ गरेर नाराबाजी सुरु गरेका छन्। सभामुखले बैठक अगाडि बढाउन आग्रह गरे पनि नाराबाजी नरोकिएपछि बैठक अघि बढाएका छन्। 

बैठक दिउँसो दुई बजेका लागि बोलाइएकोमा साढे दुई बजे सुरु भएको थियो। संघीय संसद्को चालू (नवौं अधिवेशन) सुरु भएदेखि नै एमालेले निरन्तर अवरोध गर्दै आएको छ। माधवकुमार नेपाललगायत १४ जना सांसदलाई पदमुक्त गर्ने एमालेको निर्णय कार्यान्वयन नगरेर पार्टी विभाजनमा भूमिका खेलेको भन्दै सभामुख सापकोटाको भूमिकालाई लिएर एमालेले भदौ २३ गतेदेखि संसद्का हरेक बैठकमा नाराबाजी गरिरहेको छ।

आजको बैठकमा सभामुखले राष्ट्रपतिको कार्यालयबाट प्राप्त मन्त्रिपरिषद् गठनसम्बन्धी पत्रको व्यहोरा पढेर सुनाउने, प्रतिनिधिसभाका सचिव गोपालनाथ योगीले  विनियोजन विधेयक, २०७८ का सम्बन्धमा राष्ट्रियसभाबाट प्राप्त सन्देशको जानकारी गराउने, आर्थिक विधेयक, २०७८ माथि छलफल हुने, अर्थमन्त्री जनार्दन शर्माले आर्थिक विधेयक, २०७८ लाई पारित गरियोस् भनी प्रस्ताव प्रस्तुत गर्ने लगायत कार्यसूची छन्।