भारतमा झनै फैलियो कोरोना, एकै दिनमा ९६ हजार संक्रमित

काठमाडौं- महामारीको रुप लिएको कोरोना भाइरस छिमेकी मुलुक भारतमा झनै तिब्र गतिमा फैलिएको छ । बुधबार एकै दिनमा ९५ हजार ९ सय ५० जनामा संक्रमण पुष्टि भएको छ ।

हिन्दुस्तान टाइम्सले संकलन गरेको तथ्याङ्क अनुसार भारत हरेक दिन करिब १ लाख संक्रमित पहिचान हुने मुखैमा पुगेको छ ।

भारत विश्वमै सबैभन्दा उच्च संख्यामा संक्रमित थपिने देश बनेको छ । यहि गतिमा संक्रमित थपिए अमेरिकालाई समेत पछि पर्दै भारत विश्वमै सबैभन्दा बढि कोरोना प्रभावित देश बन्ने जोखिम बढेको छ।

अमेरिकामा एकै दिनमा ७९ हजार मात्रै संक्रमित पहिचान भएको रेकर्ड छ । तर, भारत पछिल्लो एक हप्ता यता हरेक दिन ८० हजार भन्दा धेरैमा कोरोना संक्रमण पुष्टि हुने गरेको छ ।

भारतमा अहिलेसम्म ४३ लाख ७० हजार भन्दामा संक्रमण पुष्टि भएको छ । अहिलेसम्म ७३ हजार ८ सय ९० जनाको कोरोनाकै कारण मृत्यु भएको छ । बुधवारमात्रै १ हजार १ सय ५२ जना संक्रमितको मृत्यु भएको छ ।

कोरोना सबैभन्दा बढी महाराष्ट्र राज्य प्रभावित भएको छ । जहाँ ९ लाख ६७ हजार ३ सयभन्दा धेरै संक्रमित भएका छन् भने २७ हजार ७ सय ८७ जनाको मृत्यु भएको छ ।

यस्तै आन्द्र प्रदेशमा ५ लाख २७ हजार ५ सय संक्रमित हुँदा ४ हजार ६ सय ३४ जनाको मृत्यु भएको छ । तमिलनाडुमा ४ लाख ८० हजार ५ सय जनामा संक्रमण पुष्टि हुँदा ८ हजार ९३ जनाको मृत्यु भएको छ ।