नेविसंघका महामन्त्री बलदेव जो वडामै पराजित भए

काठमाडौं– नेपाली कांग्रेसको विद्यार्थी भ्रातृसंगठन नेपाल विद्यार्थी संघका महामन्त्री बलदेव तिमल्सिना वडा अधिवेशनमा पराजित भएका छन्।  सिन्धुपाल्चोकको त्रिपुरा सुन्दरी गाउँपालिका–३ मा मंगलबार भएको निर्वाचनमा उनी पराजित भएका हुन्। उनी क्षेत्रीय प्रतिनिधिमा उठेका थिए।

तिमल्सिना पूर्वमहामन्त्री कृष्णप्रसाद सिटौला निकट मानिन्छन्। उनी सिटौलाकै सिफारिसमा महामन्त्रीमा नियुक्त भएका थिए। उनलाई कांग्रेस महाधिवेशनमा  जिल्ला सभापतिको प्रत्यासीका रूपमा लिइएको थियो।

यस्तै सिन्धुपाल्चोकका पूर्व जिल्लासभापति भूपेन्द्रबहादुर थापा पनि वडामै पराजित भएका छन्। थापा संविधानसभा निर्वाचनमा प्रत्यक्षतर्फका उम्मेदवार पनि थिए।

महिला संघ सिन्धुपाल्चोककी अध्यक्ष गीता नेपाल पनि क्षेत्रीय प्रतिनिधि बन्न पाइनन्। सुनकोसी गाउँपालिकाकी उपाध्यक्ष लक्ष्मी पौडेल पनि वडामै पराजित भइन्।