शेखर कोइरालाले जिल्ला अधिवेशनपछि उम्मेदवारी घोषणा गर्ने

विराटनगर– नेपाली काग्रेसका केन्द्रीय सदस्य शेखर कोइरालाले जिल्ला अधिवेशनपछि उम्मेदवारी घोषणा गर्ने बताएका छन्। वडा अधिवेशन शुरु भएको भन्दै उनले महाधिवेशन प्रतिनिधि, महासमिति र जिल्ला अधिवेशनपछि पार्टी सभापति पदमा उम्मेदवारी घोषणा गर्ने बताए। 

विराटनगर विमानस्थलमा शनिबार पत्रकारसँगको कुराकानीमा नेता कोइरालाले भने,‘ साथीभाइसँगको सल्लाहमा गरेर मात्र केन्द्रीय सभापतिको उम्मेदवारी घोषणा गर्छु।’

नेता कोइरालाले नेपाली कांग्रेसको ७५ वर्षको इतिहासमा प्रहरी, प्रशासन लगाएर अधिवेशन भएकोमा त्यसको विरोध गरे। ‘नेपाली कांग्रेस लोकतान्त्रिक पार्टी हो, तर अलोकतान्त्रिक पद्धतिबाट विधान मिचेर सञ्चालन भइरहेकोले आगामी महाधिवेशनबाट नेतृत्व परिवर्तन गर्नुपर्छ,’ उनले भने।

दलहरुवीच राष्ट्रिय सहमती कायम गरी एमसीसी पास गर्नुपर्ने उनको भनाई छ । उनले भने,‘ विकासको योजनालाई सहमती कायम गरि पास गर्नु पर्छ ।’ प्रदेश १ सरकारको नेतृत्व काँग्रेसले पाउनु पर्ने उनले बताए । उनले भने,‘ प्रदेश १ वा वागमतिमा हाम्रो नेतृत्व हुनुपर्छ ।’ 

वर्तमान गठबन्धन आगामी निर्वाचनसम्म जानु पर्ने उनले बताए । निर्वाचन सम्म सँगै गएपनि  चुनावी तालमेलमा जानु नहुनेमा उनको जोड छ ।