सार्वजनिक सवारीमा ५० प्रतिशतभन्दा बढी यात्रु राखे कारबाही

काठमाडौं- सवारी साधनमा ५० प्रतिशतभन्दा बढी यात्रु बोकेमा ट्राफिक प्रहरीले कारबाही गर्ने जनाएको छ।

लकडाउन खुले पनि कोरोना संक्रमणको जोखिम कायम रहेकोले सार्वजनिक यातायातका साधनमा सामाजिक दूरी कायम नगरेको पाइएमा कारबाही गर्ने महानगरीय ट्राफिक महाशाखाकाले जनाएको छ।

महाशाखाका प्रमुख प्रहरी वरिष्ठ उपरीक्षक भिमप्रसाद ढकालले सवारी साधानमा सामाजिक दूरी कायम नगरेको, चालक र यात्रुले मास्क नलगाए, बढी भाडा लिए, आधा भन्दा बढी यात्रु बोकेको पाइएमा कारबाही गरिने बताए।

महाखाकाले अनुगमनका लागि सादा पोषाकमासमेत प्रहरी परिचालन गरिएको जनाएको छ।

उक्त टोलीले ‘उपत्यकाका २९ स्थानमा चेकप्वाईन्टका साथै बसपार्क, बसबिसौनी र विशेषगरी गुडिरहेको सार्वजनिक सवारीलाई विशेष अनुमगन गर्ने महाशाखाले जनाएको छ।

महाशाखाका अनुसार बुधबारमात्रै स्वास्थ्य मन्त्रालयले जारी गरेको स्वास्थ्य मापदण्डअनुसार नचलाइएका ८७२ वटा सार्वजनिक सवारी साधनलाई सम्झाईबुझाई गरिएको छ।

लकडाउन शुरु भएदेखि महाशाखाले ट्राफिक नियम उल्लघंन गर्नेलाई गरिने कारबाही बन्द गरेको थियो।

लेन पालना नगर्ने, एकतर्फी बाटोमा सवारी साधन चलाउने, अनधिकृत पार्किङ गर्ने, तीव्र गतिमा कुदाउने, हर्न बजाउने, सवारी साधनको स्वरुप बिगारेर चलाउनेजस्ता ट्राफिक नियम उल्लंघन गर्नेविरुद्ध बुधबारदेखि कारबाही सुरु गरेको महाशाखाका प्रवक्ता वामदेव गौतमले जानकारी दिए।