विराटनगरका एक जना कोरोना संक्रमित सम्पर्कविहीन

विराटनगर– कोरोना संक्रमण देखिएका विराटनगरका एक ५० वर्षीय पुरुष बुधबार सम्पर्कविहीन बनेका छन् ।

विराट नर्सिङ होम एवं विराटनगर अस्पतालमा स्वाब संकलन गरेर परीक्षणका लागि कोसी अस्पतालमा पठाइएको थियो । हिजो गरिएको परीक्षणबाट उनलाई कोरोना पोजेटिभ देखिएको थियो ।

विराटनगर महानगरपालिकाले खोजी गरिए पनि संक्रमित पुरुषको पहिचान हुन नसकेको र हालसम्म फेला नपारिएको जानकारी दिएको छ ।

स्वाब संकलन गर्ने क्रममा ती पुरुषको स्थायी ठेगाना लेखेको थिएन । ठेगानामा विराटनगरमात्रै उल्लेख गरिएको छ । पूरै ठेगाना नटिपेका कारण कोरोना पोजेटिभ देखिएका उनलाई फेला पार्न नसकिएको जनाइएको छ ।

ठेगाना स्पष्ट नहुँदा संक्रमितको पहिचान गर्नै मुस्किल परेको महानगरका एक कर्मचारीले बताए ।

प्रदेश प्रहरी सिल

एक जना प्रहरीलाई कोरोना भाइरसको संक्रमण पुष्टि भएपछि विराटनगरस्थित प्रदेश १ प्रदेश प्रहरी कार्यालय सिल गरिएको छ । संक्रमण पुष्टि भएका प्रहरीलाई केही दिनअघि ज्वरो र हाच्छ्यूँ आउने लक्षण देखिएपछि होम क्वारेन्टिनमा बस्दै आएका थिए ।

कोशी अस्पतालको प्रयोगशालामा गरिएको परीक्षणमा गएराति उनलाई कोरोना भाइरसको संक्रमण पुष्टि भएको प्रदेश प्रहरी कार्यालयका प्रवक्ता एसपी दिपक पोखरेलले जानकारी दिए ।

उनी विराटनगरकै स्थानीय भएको बताइएको छ । कोरोना पुष्टि भएपछि उनलाई विराटनगरस्थित कोशी अस्पतालको कोभिड–१९ उपचार केन्द्रमा भर्ना गरिएको एसपी पोखरेलले बताए ।