नवजात शिशुको हत्या गर्ने आमा जेल चलान

धनगढी– नवजात शिशुको घाँटी निमोठेर हत्या गरेको आरोपमा एक महिलालाई कारागार चलान गरिएको छ। बैतडीको डिलाशैनी गाउँपालिका वडा नम्बर ७ की ३५ वर्षीया माधवी कार्कीलाई कारागार चलान गरिएको हो।

जिल्ला अदालतका न्यायाधीश तीलकबहादुर कार्कीको एकल इजलासले माधवीलाई पुर्पक्षका लागि कारागार चलान गर्न आदेश दिएको हो। गत भदौ ६ गते अवैध सम्बन्धबाट आफैंले जन्माएको शिशुको घाँटी निमोठेर हत्या गरेको उनीमाथि आरोप लागेको थियो। घटनाबारे परिवारले खबर गरेपछि कार्कीलाई प्रहरीले पक्राउ गरेको थियो।

कार्कीलाई पक्राउ गरेर कर्तव्य ज्यान मुद्दा अन्तर्गत अदालतमा पेस गरेको प्रहरी निरीक्षक दर्शन खड्काले बताए। गाउँकै एक किशोरसँग अवैध सम्बन्ध रहेको र उनी हाल फरार रहेको प्रहरी निरीक्षक खड्काले बताए। 

उनका श्रीमान् १० वर्षदेखि वैदेशिक रोजगारीको सिलसिलामा विदेशमा छन्। नेपाल समयले यसबारे भदौ ८ गते जब ३५ वर्षीया माधवी ‘कुमाता’ बनिन् शीर्षकमा राखेर समाचार प्रकाशन गरेको थियो।