दैलेखमा शिक्षक हत्याका दोषी पहिचान

सुर्खेत– दैलेखको मालिका माध्यमिक विद्यालयका शिक्षक नगेन्द्रकुमार विसीको हत्यामा संलग्न व्यक्तिहरु पक्राउ परिसकेको प्रहरीले दाबी गरेको छ। ‘दोषीहरू नियन्त्रणमै छन्, अनुसन्धान सकारात्मक रूपले अगाडि बढेको छ,’ दैलेखका डीएसपी अनुपम श्रेष्ठले भने, ‘अनुसन्धान सकेपछि अभियुक्तलाई सार्वजनिक गर्छौँ।’ 

प्रहरीले शिक्षकको हत्यामा दुई जना व्यक्तिहरु संलग्न रहेको निष्कर्ष निकालेको छ। अहिले ती दुई जनामाथि नै अनुसन्धान भइरहेको प्रहरीले जनाएको छ।  ‘सोधपुछका लागि धेरैजनालाई नियन्त्रणमा लिएका थियौं, तीमध्ये दुई जना दोषी रहेको प्रमाण फेला पारेको छ,’ उनले भने, ‘अनुसन्धान सकारात्मक रुपले अगाडि बढेको छ।’ ती दुई जना व्यक्तिहरू सोमबार रातिसम्म हत्या गरिएका शिक्षकसँगै रहेको प्रहरीको दावी छ।

सोमबार राति विद्यालयसँगै जोडिएको भवनमा पसल सञ्चालकका परिवारका चार सदस्य र गुराँस गाउँपालिका–८ छोटेपोखरा टोलकै चार स्थानीय युवाहरूसँग थिए। शिक्षकको हत्यापछि मंगलबार दिउँसो प्रहरीले सुरूमा ८ जनालाई सोधपुछका लागि नियन्त्रणमा लिएको थियो। तीमध्ये दुई जना व्यक्तिमाथि गहिरो तरिकाले अनुसन्धान गरिरहेको प्रहरीले जनाएको छ।

शिक्षक गुराँस गाउँपालिका–८ छोटेपोखरास्थित मालिका माध्यमिक विद्यालयमा ५६ सालदेखि कार्यरत थिए। सोमबार राति विद्यालयको प्रांगणमै हत्या गरिएको अवस्थामा शिक्षकको शव भेटिएको थियो।