नाराबाजीको बेवास्ता गर्दै बैठक अघि बढाए सभामुखले

काठमाडौं– प्रमुख प्रतिपक्षी दल नेकपा (एमाले)ले आज (मंगलबार) पनि प्रतिनिधिसभाको बैठक अवरुद्ध गरेको छ। सभामुखले बैठक सुरु भएको जनाउ दिनेबित्तिकै एमालेका सांसदहरुले बेल घेरेर नाराबाजी सुरु गरेका छन्।

तर, सभामुखले वास्तै नगरी बैठक अघि बढाएका छन्। सभामुख अग्नि सापकोटाले बैठक सुरु हुनेबित्तिकै अर्थमन्त्री जनार्दन शर्मालाई प्रतिस्थापन विधेयक पेस गर्न समय दिएका थिए। 

एमालेले संसद् अवरोध गरेको आज चौथो दिन हो। प्रतिनिधिसभाको नवौं अधिवेशन सुरु भएपछि प्रमुख प्रतिपक्षी दल नेकपा एमालेले लगातार संसद् अवरोध गरिरहेको छ। गत बिहीबार, शुक्रबार र आइतबारको प्रतिनिधिसभा बैठक पनि एमालेले अवरुद्ध गरेको थियो। शुक्रबारको बैठक भने नाराबाजीकै बीच सभामुखले सञ्चालन गरेका थिए। 

सभामुख अग्नि सापकोटाले माफी माग्नुपर्ने र एमालेले निष्काशनको कारबाही गरेका माधव नेपालसहितका १४ सांसदलाई पदमुक्त गर्नुपर्ने माग एमालेको छ।