माओवादीले ६ महिनापछि तोक्यो सुर्खेतका स्थानीय तहमा नेतृत्व

सुर्खेत- नेकपा माओवादी केन्द्रले सुर्खेतका सबै स्थानीय तहमा इन्चार्जहरु तोकेको छ। जसअनुसार चौकुने गाउँपालिकामा खड्कबहादुर विश्वकर्मा, पन्चपुरी नगरपालिकामा धनबहादुर विक, बराहाताल गाउँपालिकामा ईश्वरीभक्त सुनार र वीरेन्द्रनगर नगरपालिकामा दानसिंङ सुनारलाई इन्चार्ज तोकेको छ।

त्यस्तै लेकवेशी नगरपालिकामा सीताकुमारी नेपाली, भेरिगंगा नगरपालिकामा नन्दबहादुर कार्की, गुर्भाकोट नगरपालिकामा ठम्मरबहादुर बिष्ट, चिंगाड गाउँपालिकामा जितबहादुर राना र सिम्ता गाउँपालिकामा झुपबहादुर बुढालाई इन्चार्ज तोकेको हो।

नेकपा विघटन भएको ६ महिनापछि माओवादीले स्थानीय तहमा नेतृत्व तोकेको हो। तत्कालीन नेकपा हुँदा एमाले र माओवादीबाट समान हैसियतमा स्थानीय तहको कमिटीहरु बनेका थिए। 

एमालेले अध्यक्ष लिएको पालिकामा माओवादीले सचिव र माओवादीले सचिव लिएको पालिकामा एमालेले अध्यक्षको जिम्मेवारी सहितका कमिटीहरु बनेका थिए।

फागुन २३ मा सर्वाेच्च अदालतले एमाले र माओवादीलाई पुरानै अवस्थामा फर्काएपछि स्थानीयमा माओवादीका पार्टी संरचनाहरु नेतृत्व विहीन थिए। 

आइतबार नेतृत्व तोकेको माओवादीले इन्चार्जहरुले आज (सोमबार)देखि जिम्मेवारी सम्हालेको माओवादी केन्द्र सुर्खेतका संयोजक कृष्ण जिसीले जानकारी दिए।