खोप लगाएका व्यक्तिमा दादुराको संक्रमण, सल्यानमा पनि भेटिए बिरामी

सुर्खेत- कर्णाली प्रदेशमा जाजरकोटपछि सल्यानमा पनि दादुराका बिरामी भेटिन थालेका छन्। सल्यान जिल्ला बनगाड कुपिन्डे गाउँपालिका–२ बामेकी ५ वर्षीया कमला शर्मा, शारदा नगरपालिका –८ मार्केकी साढे ३ वर्षीया कालिका जिसी र सिद्धकुमाख गाउँपालिका–३ डोरचौरकी ३ वर्षिया बालिका गृष्मा थापालाई दादुरा संक्रमण भएको पुष्टि भएको हो। 

राष्ट्रिय प्रयोगशाला टेकुमा गरिएको परीक्षणले संक्रमण पुष्टि गरेको प्रदेश स्वास्थ्य सेवा निर्देशनालयका सूचना अधिकारी नोदनारायण चौधरीले जानकारी दिए। तीन जनामध्ये दुई बालिकाले दादुराविरुद्धको खोप पनि लगाएको चौधरीले जनाए। 

‘खोप लगाएका बालबालिकामा दादुरा हुँदैन भन्ने मान्यता छ,’ चौधरीले भने, ‘तर सल्यान र जाजरकोटमा दादुराविरुद्धको खोप लगाएका बालबालिकामा पनि दादुराको संक्रमण देखिएको छ।’

केही दिनअघि जाजरकोटको भेरी नगरपालिका–१ रावतगाउँकी ९ वर्षीया रन्जीता विक, ८ वर्षीया भवानी विक र ११ महिने यसुधा रानालाई दादुरा भएको संक्रमण पुष्टि भएको थियो। उनीहरूले पनि दादुराविरुद्धको खोप लगाएका थिए। खोप लगाएका बालबालिकामा पनि दादुरा संक्रमण देखिएपछि विश्व स्वास्थ्य संगठन (डब्लुएचओ) र युनिसेफले अनुसन्धान थालेको बताएका छन्।

संक्रमण देखिएको रावतगाउँमा विश्व स्वास्थ्य संगठनका चिकित्सक र प्रदेश स्वास्थ्य सेवा निर्देशनालयका स्वास्थ्यकर्मीले अध्ययन थालेको चौधरीले जनाए। रावत गाउँका सामुदायस्तरमा परीक्षण गरिएको थियो। १८ जना बालबालिकामा परीक्षण गर्दा तीन जना संक्रमण पुष्टि भएको हो। दादुराविरुद्धको खोपको म्याद सकियो वा लगाउँदा प्राविधिक कमजोरी भएका कारण बालबालिकामा दादुरा संक्रमण हुनसक्ने उनको तर्क छ।