धौलागिरी अस्पतालमा कार्यरत स्वास्थ्यकर्मीले पाएनन् जोखिम भत्ता

पोखरा– धौलागिरी अस्पताल बागलुङमा कार्यरत स्वास्थ्यकर्मीले कोरोना संक्रमित बिरामीलाई उपचार गरेबापतको जोखिम भत्ता एक वर्षदेखि पाउन सकेका छैनन्। सरकारले अग्रपंक्तिमा खटिएर काम गर्ने स्वास्थ्यकर्मीलाई शतप्रतिशत र दोस्रो लाइनमा खटिनेलाई ५० प्रतिशत भत्ता दिने निर्णय गरे पनि अस्पताल कार्यरत स्वास्थ्यकर्मीले अहिलेसम्म पाउन सकेका छैनन्। 

जोखिम मोलेर काम गर्दा भत्ता नपाउँदा अस्पतालमा भएका डाक्टर अन्यत्र सरुवा भई जाने र अस्पतालमा सरुवा भएका चिकित्सकसमेत नआउँदा बिरामीको उपचारमा समस्या हुन थालेको छ। गत वर्ष क्वारेन्टिन चलाउँदा खटिएका स्वास्थ्यकर्मी र अन्य कर्मचारी गरी झन्डै दुई सय जनाले भत्ता पाएका छैनन्। स्वास्थ्यकर्मी र चिकित्सकले गण्डकी प्रदेश तथा संघीय सरकारमा जानकारी गराउँदासमेत सुनुवाइ नभएको गुनासो गरेका छन्।  

धौलागिरी अस्पतालका चिकित्सक प्राग गजुरेलका अनुसार अस्पतालमा डेढ वर्षमा झन्डै ७ सय बिरामीको उपचार गरेको तथ्यांक छ। आइसोलेसनमा लगातार ३–४ महिनासम्म खटिएका चिकित्सक र नर्स २५ जनाले जोखिम भत्ता नपाएको उनले बताए। यस्तै ल्याबमा खटिने थप १० जना, १० वटै पालिकामा स्थापना भएको कोभिड अस्पतालका ५ जनाको दरले ५० जना, १० जना चालक र स्वास्थ्य संस्थामा कार्यरत थप १ सय गरी झण्डै २ सयले कुनै पनि भत्ता नपाएको स्वास्थ्य कार्यालय बागलुङले जनाएको छ।