तीज कार्यक्रममा दुई समूहबीच झडप, ७ जना घाइते

धनगढी- तीज कार्यक्रम भइरहेको समयमा कञ्चनपुरमा दुई समूहबीच झडप हुँदा ७ जना घाइते भएका छन्। शनिबार जिल्लाको कृष्णपुर नगरपालिका-१ को भेटघाट शिविरमा तीज कार्यक्रममा दुई समूहबीच झडप भएको प्रहरीले जनाएको छ।

झडपमा कृष्णपुर नगरपालिका वडा नम्बर १ का अन्दाजी २८ वर्षीय चन्द्रबहादुर धामी, अन्दाजी ३५ वर्षीय नरेन्द्र भण्डारी, ३८ वर्षीय नारायण दमाई र ६५ वर्षीय गोविन्द दमाई गम्भीर घाइते भएको ईलाका प्रहरी कार्यालय झलारीका इन्चार्ज प्रहरी निरीक्षक कर्णबहादुर बोहराले बताए ।

उनीहरुको टाउकोमा चोट लागेकाले उपचारका लागि धनगढी पठाइएको छ। झडपमा सोही ठाउँका बलबहादुर डाँगी, मनोज खत्री र किसन खत्री सामान्य घाइते भएको प्रहरी निरीक्षक बोहराले बताए। उनीहरुको स्थानीय क्लिनिकमा उपचार भइरहेको बोहराले बताए।

कुटपिट गरेको आरोपमा कृष्णपुर-१ का विजय भण्डारी र वडा नम्बर २ का प्रेम महरालाई पक्राउ गरिएको उनले बताए। घटनामा ८/१० जना संलग्न भएको पाइएको र उनीहरुको खोजीकार्य भइरहेको उनले बताए। 

'मादक पदार्थ सेवन गरेका दुई समूहबीच झडप भएको बुझिएको छ,' उनले भने, ‘यस विषयमा थप अनुसन्धान भइरहेको छ।’