१०१ वर्षमा सत्यमोहन

काठमाडौं– ‘शताब्दी पुरुष’ सत्यमोहन जोशी १०१ वर्ष पुगेका छन्। नेपाली कला, संस्कृति र साहित्यमा योगदान पुर्याएका ललितपुर निवासी जोशी आज (वैशाख ३० गते) १०१ वर्ष पुगेका हुन्।

गत वर्ष सय वर्ष पुगेको अवसरमा जोशीलाई ललितपुर महानगरपालिकाले सम्मानस्वरूप नगरपरिक्रमा गराएको थियो। तर, यस वर्ष लकडाउनका कारण कुनै कार्यक्रम नगरिएको महानगरपालिकाले जनाएको छ।

यसैबीच, नेपालका लागि अमेरिकी राजदूत र्‍याण्डी बेरीले जोशीलाई जन्मदिनको शुभकामना दिएका छन्। बेरीले ट्वीटरमार्फत् जोशीलाई जन्मदिनको शुभकामना दिँदै सुस्वास्थ्यको कामना गरेका छन्।

नेपाली भाषा, कला, संस्कृतिको संरक्षण, संस्कृतिको संरक्षण, सम्बर्धन र विकासमा लागि परेका हुनाले उहाँको योगदानको कदर स्वरूप जोशीलाई सुप्रबल गोर्खा दक्षिणबाहु विख्यात त्रिशक्ति पट्ट, आदिकवि भानुभक्त पुरस्कार, काठमाडौं विश्व विद्यालयले विद्यावारिधीको मानार्थ प्रमाणपत्र प्रदान गरेको छ। नेपाल सरकारले पनि उज्ज्वल कीर्तिमान राष्ट्रदीपले सम्मानित गरेको छ । 

तीन पटकसम्म मदन पुरस्कार पाएका जोशीका प्रबन्ध तथा अनुसन्धानात्मक कृति नेपालीमा १०, नाटक पाँच, काव्य दुई र कथा सङ्ग्रह पाँच तथा नेवारी भाषामा गरी करिब ५० कृति प्रकाशित भइसकेका छन् ।