प्रहरीको आँखा छलेर मुम्बईबाट आएका थिए कपिलवस्तुका कोरोना संक्रमित

कोरोना भाइरसको संक्रमण पुष्टि भएका कपिलवस्तुका दुई युवक एक साताअघि भारतबाट प्रहरीको आँखा छलेर नेपाल प्रवेश गरेको खुलेको छ।

नेपाल भारत नाका पूर्ण रूपमा सिल गरिए पनि कपिलवस्तुको मायादेवी गाउँपालिका २ का १६ वर्षीय र २२ वर्षीय युवक रातको समयमा लुकिछिपी नेपाल प्रवेश गरेको प्रहरी अनुसन्धानबाट पुष्टि भएको हो ।

उनीहरु भारतको मुम्बईबाट हिँड्दै नेपालसम्म आइपुगेको कपिलवस्तुका प्रमुख जिल्ला अधिकारी दीर्घनारायण पौडेलले जानकारी दिए।

उनीहरु नेपाल प्रवेशको गरेको तीन दिनपछि प्रहरीले थाहा पाएको थियो। त्यसपछि उनीहरुलाई पक्राउ गरेर मायादेवी १ पकडीस्थित छत्रपाली तीर्थादेवी विद्यालयको क्वारेन्टिनमा राखिएको थियो ।

त्यसको दुई दिनपछि स्वाब संकलन गरेर परीक्षणका लागि ल्याइएको थियो । हिजो बिहीबार राष्ट्रिय जनस्वास्थ्य प्रयोगशाला काठमाडौंमा परीक्षण गर्दा दुईजनामा संक्रमण पुष्टि भएको हो ।

उनीहरूलाई हाल रूपन्देहीको कोरोना अस्पतालको आइसोलेसनमा राखिएको छ। दुवैको स्वास्थ्य अवस्था सामान्य रहेको पठाइएको प्रमुख जिल्ला अधिकारी पौडेलले बताए ।

संक्रमण पुष्टि भएपछि स्थानीय प्रशासनले उनीहरूको परिवार, सम्पर्कमा रहेका व्यक्तिहरूको ट्रेसिङको काम शुरु गरेको छ।