इरानमा फेरि बल्झियो कोरोना संक्रमण

मध्यपूर्वको इरानमा कोरोना भाइरसको संक्रमण पुनः बढेको छ। लगभग नियन्त्रणमा आइसकेको इरानमा बुधबार अचानक करिब १७ सय नयाँ संक्रमण फेला परेको छ।

यो संख्या ११ अप्रिलपछि सबैभन्दा बढी हो। योसँगै त्यहाँ कोरोना संक्रमितको संख्या १ लाख नाघेको छ।

पछिल्लो २४ घण्टामा इरानमा ७८ जनाको मृत्यु भएको छ भने कुल मृतकको संख्या ६ हजार ४१८ पुगेको छ।

पछिल्ला चार दिनमा संक्रमण लगातार बढिरहेको छ। त्यहाँ कोरोना संक्रमण दोस्रो चरणमा प्रवेश गरेको बीबीसीले बताएको छ। गत डिसेम्बर अन्तिममा चीनमा पहिलोपटक कोरोना देखिएकोमा त्यसपछि इरानमा सल्केको थियो।

संक्रमण केही नियन्त्रणमा आएपछि इरानमा अप्रिल ११ देखि लकडाउन खुकुलो पारिएको थियो। कम जोखिम मानिएका क्षेत्रमा मस्जिद समेत खुलेका थिए।

यसैबीच, मध्यपूर्वका मुलुकमा कोरोना भाइरस फैलाउन इरान जिम्मेवार रहेको बीबीसीले दाबी गरेको छ। बीबीसीको अरबी सेवाले दाबी गरेअनुसार इरानको एक एयरलाइन्स कम्पनी यसमा मुख्य जिम्मेवार छ।

फ्लाइट ट्रयाकिङ डाटा तथा ओपन सोर्स भिडियोहरुको विश्लेषणपछि बीबीसी यो निष्कर्षमा पुगेको उसले बताएको छ। इरानको ‘महान’ एयरलाइन्स कोरोना संक्रमित केही यात्रु लिएर इराक र लेबनान गएको थियो।

सरकारको प्रतिबन्धका बाबजुद इरानको सबैभन्दा ठूलो उक्त विमान कम्पनीले आफ्नो उडान जारी राखेको थियो।

एयरलाइन्स सम्बद्ध सूत्रका अनुसार विमानको क्याबिन क्रुका दर्जनौं सदस्यमा कोरोनाको लक्षण देखिएको थियो। यसबारे कर्मचारीले आवाज नउठाएका पनि होइनन्। तर, उनीहरुलाई चुप गराइयो।