मौसम बदली सोमबारसम्म, तर ठूलो पानी नपर्ने

काठमाडौं– सोमबारसम्म मौसम बदली हुने तर ठूलो वर्षा नहुने पूर्वानुमान मौसम पूर्वानुमान महाशाखाले गरेको छ।

महाशाखाका अनुसार तीन दिनसम्म मौसम सफा नरहे पनि ठूलो वर्षाको सम्भावना छैन। मनुसन भने अक्टोबर पहिलो सातासम्म नै सक्रिय रहनेछ। 

महाशाखाका अनुसार हाल नेपालमा भारतको पूर्वी राजस्थान आसपासमा अवस्थित न्यून चापीय क्षेत्र र बंगालको खाडीको मध्यपूर्वी भूभागमा अवस्थित न्यून चापीय क्षेत्रको सामान्य प्रभाव छ। साथै  मनसुन न्यून चापीय रेखा औसतभन्दा दक्षिणतर्फ छ।

केही दिनसम्म देशका केही स्थानहरुमा मेघ गर्जन र चट्याङसहित हल्कादेखि मध्यम वर्षाको सम्भावना रहेकोले पहाडी भू–भागमा भूक्षय, पहिरो तथा गेग्रान बहावको जोखिमसँगै नदीनाला र खहरे खोलामा पानीको सतह बढ्न सक्ने भएकोले सामान्य सतर्कता अपनाउन महाशाखाले अनुरोध गरेको छ। 

आइतबार दिउँसो देशको अधिकांश भू–भागमा  सामान्य बदली रही केही स्थानहरुमा मेघ गर्जन र चट्याङसहित हल्कादेखि मध्यम वर्षाको सम्भावना छ। त्यसैगरी सोमबार देशभर सामान्य बदली रही धेरै स्थानहरुमा हल्कादेखि मध्यम वर्षाको सम्भावना छ।