जुम्लामा नेकपा (एस)को शक्ति प्रदर्शन, एमालेभन्दा बलियो भएको दाबी

जुम्ला– नेपाल कम्युनिष्ट पार्टी (एकीकृत समाजवादी) ले शनिबार जुम्लामा शनिबार शक्ति प्रदर्शन गरेको छ। नेकपा एमालेबाट विभाजित भएर बनेको पार्टीले जुम्लामा प्रथम जिल्ला कार्यकर्ता भेला गर्दै शक्ति प्रदर्शन गरेको हो। 

जिल्ला भेलामा जुम्लाका आठै स्थानीय तहका करिब ५ हजार कार्यकर्तालाई सदरमुकाम खलंगा आएका थिए। भेलालाई सम्बोधन गर्दै एकीकृत समाजवादी कर्णाली प्रदेश इन्चार्ज प्रकाश ज्वालाले हजारौं कार्यकर्ताको समर्थन र उपस्थितिले जुम्लामा एमाले पार्टी विलय भएको ठोकुवा गरे। केपी ओलीको पछि लाग्नेको राजनीति सकिएको उनले टिप्पणी गरे। 

कार्यक्रममा कर्णालीका कृषिमन्त्री कुर्मराज शाही, सांसद पदम रोकाया लगायतले कर्णालीकै सबैभन्दा ठूलो र बहुमत भएको एकीकृत समाजवादी पार्टी जुम्लामै निर्माण हुने विश्वास व्यक्त गरे। 

एकीकृत समाजवादी जुम्लाका अध्यक्ष तीर्थ बुढाले एउटै घरभित्र पनि सधैं किचलो, सधैं अन्याय र अत्याचार सहेर बस्न नसकिने भन्दै एमालेभित्र केपी ओलीको अत्याचार बढेपछि विद्रोहका रुपमा एमालेभित्रै वैकल्पिक शक्तिका रुपमा एकीकृत समाजवादीको उदय भएको बताए। उनले पनि जुम्लामा एमाले समाप्त भइसकेको दाबी गरे।

जुम्लाका एमालेबाट निर्वाचित ९० जना जनप्रतिनिधिमध्ये ४४ जनाले समाजवादीमा सनाखत गरेका छन्। त्यसैगरी ६१ जनाको जिल्ला कमिटी रहेकोमा ५८ जनाले समाजवादी रोजेका छन्।