१२० जनामा कोरोना संक्रमणको आशंका

हाल नेपालमा ३३० जना कोरोना भाइरसका सम्भावित संक्रमित भएको स्वास्थ्य तथा जनसंख्या मन्त्रालयले जनाएको छ ।

मन्त्रालयको नियमित पत्रकार सम्मेलनमा प्रवक्ता विकास देवकोटाले मोबाइल एप र मन्त्रालयको वेबसाइटमा गरिएको स्वमूल्यांकनका आधारमा ३ सय ३० जना व्यक्तिहरु रेड जोनमा रहेको जानकारी दिए ।

साथै कोरोनाको आशंकामा १२० जना आइसोलेसनमा छन् । नेपालमा हालसम्म ६६ हजारभन्दा बढीको कोरोना परीक्षण गरिएको छ । पिसीआर विधिबाट १३ हजार ८ सय ५० जनाको परीक्षण भएको छ भने आरडीटिबाट ५२ हजार २ सय २७ जनाको कोरोना परीक्षण गरिएको स्वास्थ्य मन्त्रालयले जानकारी दिएको छ।

परीक्षण गरिएकामध्ये अहिलेसम्म ८२ जनामा संक्रमण देखिएको छ भने संक्रमितमध्ये १६ जना उपचारपछि निको भएर घर फर्किएका छन् ।

देशभर २१ हजार ९९ जना क्वारेन्टिनमा रहेका छन् । संक्रमितमध्ये ६१ पुरुष र २१ महिला छन् । संक्रमितमध्ये प्रदेश १ मा ३१ जना, प्रदेश २ मा १३ जना, बागमतीमा ७ जना, गण्डकीमा २ जना र प्रदेश ५ मा २४ जना, सुदुरपश्चिममा ५ जना रहेका छन् । कर्णाली प्रदेशमा अहिलेसम्म कुनै पनि संक्रमित भेटिएका छैनन् ।

हाल उपचाररत संक्रमितमध्ये रुपन्देहीमा १, नेपालगञ्जमा २३, विराटनगरमा ३१, वीरगञ्जमा ९, भरतपुरमा १ र धनगढीमा १ जनाको सामान्य अवस्थामा उपचार भइरहेको छ । उपचाररत सबैको अवस्था सामान्य रहेको प्रवक्ता देवकोटाले जानकारी दिए ।