जुम्लामा पनि पीसीआर परीक्षण सुरु

सुर्खेत- कर्णाली प्रदेशको जुम्लामा पनि कोरोना भाइरसको पीसीआर परीक्षण गरिएको छ। सोमबार रातिखि पीसीआर परीक्षण सुरु गरिएको कर्णाली स्वास्थ्य विज्ञान प्रतिष्ठान (शिक्षण अस्पताल) जुम्लाका प्रयोगशाला संयोजक विवेक पुनमगरले जानकारी दिए।

उनका अनुसार पहिलो दिन ८ जनाको मात्रै पीसीआर परीक्षण गरिएको छ। परीक्षण गरिएका सबैको रिपोर्ट नेगेटिभ आएको छन्। जुम्लाबाट पीसीआर परीक्षण सुरु भएसँग अबदेखि कर्णाली प्रदेशका दुई ठाउँ (सुर्खेत र जुम्ला) मा कोरोनाको नमुना परीक्षण हुनेछ।

जुम्लामा मेसिन आएको झन्डै १३ दिनपछि परीक्षण सुरु गरिएको हो। प्रतिष्ठानले एक पटकमा ९६ वटा नमुना परीक्षण गर्न सक्ने क्षमताको पीसीआर मेसिन २७ लाखमा चीनबाट खरिद गरी ल्याएको हो।

‘आरटी–पीसीआर मेसिनले एक पटकमा ९६ वटा नमूना परीक्षण गर्न सक्छ तर हामी २४ वटा मात्रै परीक्षण गर्ने भनेको छौं’, प्रयोगशाला संयोजक पुनले भने, ‘तत्काललाई एक पटकमा २४ वटा नमूना परीक्षण गर्छौं।’

जुम्लामा विदेशबाट आएका र सम्भावित खतराको आशंका लागेको क्षेत्रमा पुगेर स्वाब संकलन गर्ने अस्पतालले जनाएको छ। जुम्लासँग २ सय ५० जनाको परीक्षण गर्न मिल्ने एक्ट्रयाक्सन टिक रहेको छ।