तीन पटकसम्म कोरोनाको नेगेटिभ रिपोर्ट आएका युवकलाई पुनः संक्रमणको आशंका

निको भइसकेको भनेर घर पठाइएका कोरोना संक्रमित एक युवकलाई पुनः आइसोलेसनमा राखिएको छ।

नारायणी उपक्षेत्रीय अस्पताल वीरगञ्जबाट डिस्चार्ज भएको एक सातापछि रौतहटको ईशनाथ नगरपालिकाका एक युवकलाई पुनः आइसोलसनमा भर्ना गरिएको हो।

कोरोना संक्रमणको आशंका देखिएपछि १९ वर्षीय ती युवकलाई शनिबार राति वीरगञ्ज अस्पतालमा भर्ना गरिएको बताइएको छ।

उनी निको भइसकेको भन्दै वीरगञ्ज अस्पतालले १४ वैशाखमा डिस्चार्ज गरेको थियो।१६ वैशाखमा पुनः ती युवकसहित उनका परिवारका सदस्यहरुको स्वाब संकलन गरी परीक्षणको लागि टेकु पठाइएको थियो ।

परिवारका अन्य सदस्यहरुको रिपोर्ट नेगेटिभ देखिए पनि निको भइसकेको भनिएका ती युवकमा पुनः कोरोना संक्रमण भेटिएको वीरगञ्ज अस्पताल स्रोतले जनाएको छ ।

यसअघि कोरोना संक्रमित देखिएका ती युवकको लगातार तीन पटक पीसीआर रिपोर्ट नेगेटिभ आएपछि डिस्चार्ज गरिएको अस्पतालले जनाएको थियो।

अस्पताल स्रोतले जनाएअनुसार ती युवकको दुईपटक हेटौंडा र अन्तिमपटक टेकुस्थित प्रयोगशालामा स्वाब परीक्षण भएको थियो।