कश्मीरमा आतंकवादीसँग भिडन्त, कर्नेलसहित ५ सुरक्षाकर्मीको मृत्यु

कश्मिर- उत्तरी कश्मीरको हन्दवाडामा आतंकवादी समुहसँग भिडन्त हुँदा पाँच जना सुरक्षाकर्मीको मृत्यु भएको छ ।

भिडन्तमा सेनाको २१ राष्ट्रिय राइफल्सका कमान्डिङ अफिसर आशुतोष शर्मासमेत पाँच जना सुरक्षाकर्मीको मृत्यु भएको दैनिक भास्करले उल्लेख गरेको छ। मुठभेडमा सेनाको गोली लागेर दुई जना आतंकवादीको पनि मृत्यु भएको छ।

हन्दवडाको छाँजीमुल्लाहमा शनिबार दिउँसो ३ः३० बजेदेखि दोहोरो भिडन्त सुरु भएको थियो।

मारिनेमा कर्नेल आशुतोषका साथै मेजर अनुज, एक लान्स नायक र एक राइफलम्यान छन्। त्यस्तै, प्रहरीका सब–इन्सपेक्टर सकिल काजीको पनि मृत्यु भएको छ।

कर्नेल आशुतोष शर्माले गत वर्षमात्र दोस्रो पटक सेनाबाट मेडल प्राप्त गरेका थिए। उनी गार्डस् रेजिमेन्टसँग आबद्ध थिए भने इलाहाबादका बासिन्दा रहेका थिए।

आतंकवादी लुकेको सूचनाका आधारमा उत्तरी कश्मीरको एक घरमा सुरक्षा बलले आक्रमण गरेका थिए।

आतंकवादीले घरका सदस्यलाई बन्धक बनाएका थिए। उनीहरुको उद्धारका लागि सेना र प्रहरीको टोली त्यहाँ पुगेको भारतीय सञ्चारमाध्यमले जनाएका छन्।