बाँकेका कोरोना संक्रमित पुरुषका परिवारसहित ५५ जनाको पीसीआर टेस्ट गरिँदै

काठमाडौं– बाँकेका कोरोना भाइरस (कोभिड–१९) संक्रमित पुरुषको सम्पर्कमा आएका व्यक्तिहरूको आज (शनिबार) थ्रोट स्वाब परीक्षण (पीसीआर टेस्ट) गरिँदैछ।

स्वास्थ्य कार्यालय, बाँकेका प्रमुख धिरजंग शाहका अनुसार कोरोना संक्रमितको सम्पर्कमा आएका ५५ जनालाई स्वाब परीक्षण गरिँदैछ। तीमध्ये ८ जना उनका परिवारका सदस्य छन् भने बाँकी छिमेकी र आफन्त रहेको बताइएको छ। ती सबैको भेरी अञ्चल अस्पतालमा थ्रोट स्वाब परीक्षण गरिनेछ।

“कन्ट्याक्ट ट्रेसिङ गर्दा कोरोना संक्रमित पुरुषसँग ५५ जना सम्पर्कमा आएको देखिएको छ,” उनले भने। कोरोना संक्रमितको स्रम्पर्कमा आएकाहरूको परीक्षणपछि के गर्ने भन्नेबारे छलफल भइरहेको उनले बताए।

बाँकेका ६० वर्षीय पुरुषलाई शुक्रबार कोरोना संक्रमण देखिएको थियो। उनलाई कोरोना संक्रमण पुष्टि भएपछि उनको सम्पर्कमा आएकाहरूको खोजी गरिएको थियो।

अहिले उनी खजुरास्थित सुशील कोइराला प्रखर क्यान्सर अस्पतालको आइसोलेसनमा छन्।