रसियामा २४ घण्टामै ८ हजार कोरोना संक्रमित थपिए

रसियामा गत २४ घण्टामा ७ हजार ९३३ जना कोरोना भाइरस सक्रमितहरु थपिएका छन् ।

यससँगै शुक्रबारसम्म रसियामा कुल संक्रमितको संख्या १ लाख १४ हजार ४३१ पुगेको देशको कोरोना भाइरस परिक्षण केन्द्रले जानकारी दिएको छ । रसियामा कोरोना भाइरसको संक्रमणको कारण १ हजार १६९ को मृत्यु भएको छ ।

विश्वभरी ३३ लाख भन्दा बढी कोरोना भाइरस संक्रमित भएका छन् भने २ लाख ३४ हजार भन्दाको मृत्यु भएको छ ।

रुसी प्रधानमन्त्री मिखाइल मिशुस्तिनलाई पनि कोरोना भाइरसको संक्रमण भएको छ। बीबीसीका अनुसार यसबारे उनले राष्ट्रपति भ्लादिमिर पुटिनलाई भिडियो कल गरेर जानकारी दिएका छन्।

रुसी टिभी च्यानलमा उनले पुटिनलाई भनेका छन्, ‘डियर मिस्टर पुटिन, मलाई भर्खरै थाहा भयो कि मलाई कोरोना भाइरस पोजेटिभ छ। मलाई अब आइसोलेसनमा बस्नुपर्छ र डाक्टरको निर्देशन मान्नुपर्छ।’ प्रधानमन्त्री मिखाइल कोरोना नियन्त्रणका लागि निकै सक्रियताका साथ काम गरिरहेका थिए।

राष्ट्रपति पुटिनले प्रधानमन्त्रीलाई शिघ्र स्वास्थ्य लाभको कामना गरेका छन्।