‘दि हन्ड्रेड’ क्रिकेट प्रतियोगिता स्थगित

इंग्ल्यान्ड र वेल्स क्रिकेट बोर्डले आयोजना गर्ने पहिलो संस्करणको ‘द हन्ड्रेड’ क्रिकेट प्रतियोगिता एक वर्षसम्मका लागि स्थगित गरिएको छ।

विश्वव्यापी रूपमा फैलिएको कोरोना भाइरस रोग (कोभिड–१९)का कारण प्रतियोगिता स्थगित गरिएको आयोजकले बताएको हो।

प्रतियोगिता यहि वर्ष जुलाई १७ बाट ओभल रंगशालामा सुरु हुने तय भएको थियो। तर, जुलाई १ सम्मका लागि इंग्ल्यान्डमा क्रिकेट प्रतियोगितामा बन्देज गरिएको छ। यस्तो अवस्थामा बुधबार बसेको इंग्ल्यान्ड क्रिकेट बोर्ड (ईसीबी)को बैठकले खेल स्थगन गर्ने निर्णय गरेको थियो।

नयाँ स्वरूपको प्रतियोगितामा विश्वका दिग्गज क्रिकेटरको उपस्थिति गराई धेरै दर्शक जम्मा गर्ने बोर्डको लक्ष्य थियो। तर, सामाजिक दुरी राखेर हिँड्नुपर्ने महामारीको अवस्थामा विभिन्न देशबाट खेलाडी आउजाउ गर्न असम्भव छ।

“एकै खेलमा धेरै दर्शक तान्ने प्रतियोगिताको लक्ष्यलाई बन्द रंगशाला भित्रको प्रतियोगिताद्वारा सम्भव देखिँदैन,” बोर्डले जारी गरेको विज्ञप्तिमा भनिएको छ।

प्रतियोगितामा नेपालका सन्दीप लामिछाने पनि सहभागी हुने भएका थिए।

इन्डिपेन्डेन्ट