असनको साँढेझैं मैमत्त बनेको ओलीतन्त्रले के गर्दोरहेछ हेरौं : भट्टराई

काठमाडौं - राष्ट्रिय मानव अधिकार आयोगले जनता समाजवादी पार्टी (जसपा) का सांसद डा. सुरेन्द्र यादवको ’अपहरण’ प्रकरणमा उजुरी दर्ता गरेलगत्तै डा बाबुराम भट्टराईले सामाजिक सञ्जालमा कडा अभिव्यक्ति दिएका छन्।

उनले राज्यको संरक्षणमा गरिएको अपहरणकाण्डका अपराधीहरूलाई कानून बमोजिम कारबाहीको लागि आयोगमा उजुरी गरेको जानकारी दिँदै भनेका छन्, ‘कारबाहीकोनिम्ति सरकारलाई निर्देशन दिन माग गर्दै सांसद डा.सुरेन्द्र यादवद्वारा मानव अधिकार आयोगमा उजुरी! हेरौं असनको साँढे झैं मैमत्त बनेको र अरिंगाल सेनालाई सडकमा ताण्डवनृत्य निम्ति उतारेको ओलीतन्त्रले के गर्दोरहेछ!’

बिहीबार ललितपुरस्थित आयोगको कार्यालय पुगेर जसपाका नेताहरुले उजुरी दर्ता गराएका थिए। यसअघि प्रहरी र सरकारी वकिलको कार्यालयले उजुरी लिन अस्वीकार गरेको थियो। सरकारी वकिलको कार्यालयमा आज पनि पुनः उजुरी दर्ताको प्रयास गरिने पार्टीका नेताहरुले जनाएका छन्। सत्तारुढ नेकपाका सांसद महेश बस्नेत, किसान श्रेष्ठ र पूर्व आईजीपी सर्वेन्द्र खनालको टोलीले सांसद यादवको ’अपहरण’ गरेको आरोप छ।