एन्फाले खेलकर्मीलाई सहयोग गर्ने

काठमाडौं - अखिल नेपाल फुटबल संघ (एन्फा)ले फुटबलकर्मीलाई सहयोग पुर्याउने उद्देश्यले राहत तथा सहयोग समिति गठन गरेको छ। उसले आज(बुधबार) भिडियो कन्फ्रेन्स मिटिङ गर्दै समिति गठन गरेर काम अघि बढाउने बताएको हो।

कोरोना भाइरसको महामारीले नेपाली फुटबल गतिबिधि स्थगित हुँदा खेलाडी, रेफ्री, प्रशिक्षकलगायत अन्य फुटबल प्रेमीहरु प्रभावित बनेको भन्दै उसले संकटमा परेका मानिसको सूची तयार गरि सहयोग गर्नको लागि समिति बनाएको बताएको हो। एन्फाले रत्न कुमार श्रेष्ठको नेतृत्वमा समिति गठन गरेको हो।

बैठकपछि जारी गरिएको विज्ञप्तिमा भनिएको छ, ‘जिल्ला फुटबल संघ, क,ख,ग श्रेणीका क्लब, खेलाडी, रेफ्री, प्रशिक्षक, महिला संघलगायत संकटमा परेका फुटबल कर्मीको सूची निर्धारित मापदण्ड अनुसार सचिवालयको पत्र प्राप्त भएको पाँच दिनभित्र संघको सचिवालयमा उपलब्ध गराउने र उक्त सूचीलाई आवश्यक प्रमाणीकरण गरि राहत तथा सहयोग उपलब्ध गराउने निर्णय भएको छ।’

यसअघि फिफाले आफ्ना सबै सदस्य राष्ट्रलाई आर्थिक सहयोग गर्ने बताइसकेको छ। सहयोगस्वरुप एन्फाले फिफाबाट ५ लाख डलर पाउने भएको छ।