कतारमा अलपत्र श्रमिकको उद्धार

काठमाडौं- हवाई टिकट काट्ने पैसासमेत नभएर नेपाल आउन नपाई कतारमा अलपत्र परेका चार श्रमिकलाई त्यहाँस्थित नेपाली दूतावास र गैरआवसीय नेपाली संघ, कतारको पहलमा उद्धार गरिएको छ।

कतारको रोजगारी गुमेपछि स्वदेश फिर्तीको प्रतिक्षामा रहेका बाजुराको स्वामीकार्तिक खापर गाउँपालिका–३ का विकास शाही, काठमाडौंकी अस्मिता लामा, भोजपुरका मोहन पौडेल र महोत्तरीका उदयकुमार यादवलाई संले हवाई टिकटको प्रबन्ध गरी नेपाल पठाएको हो।

संघका प्रवक्ता सन्तोष क्षेत्रीका अनुसार शाही र यादव नेपाल एयरलाइन्सको विमानमार्फत शुक्रबार बिहान ९ बजे काठमाडौं आइपुगेका छन्। लामा र पौडेल भने यही भदौ १ गते नेपाल फर्किएका थिए। 'कानुनी प्रबन्ध दूतावासले मिलाउने गर्छ, संघले हवाई टिकट व्यवस्थापन गरेर उनीहरूलाई घर पठाएको हो', प्रवक्ता क्षेत्रीले टेलिफोनमा भने।

छ महिनाअघि कतार गएका शाहीले आफू स्वास्थ्यका कारण काम छाडेर नेपाल फर्किनुपरेको बताए। 'सुरुका दुई महिना काम गरेँ, त्यसपछि बिरामी परेँ', उनले भने, 'कम्पनीले पठाउन नमानेपछि दूतावास र एनआरएनएको सहयोगमा नेपाल आएँ।' संकटमा सघाएर ‘एनआरएन’ले नबिर्सने गुन लगाएको उनको भनाइ छ। काठमाडौं ओर्लेपछि आफू जन्मघर बाजुरा हिँडेको शाहीले सुनाए। 

कोभिड–१९ महामारी फैलिएयता थुप्रै अलपत्र श्रमिकलाई उद्धार र सहायता गरिएको संघले जनाएको छ। नेपाली दूतावाससँगको समन्वयमा उद्धार कार्य हुने गरेको प्रवक्ता क्षेत्रीले बताए। महामारीका बेला विदेशमा रोजगारी गुमाउने नेपाली श्रमिकको संख्या ठूलो छ।

संघको राष्ट्रिय समन्वय परिषद् कतारले उद्धार समिति नै बनाएर त्यहाँ रहेका श्रमिक नेपालीको दुःखमा साथ दिँदै आएको छ। 'समस्यामा परेका जो–कोही नेपालीलाई सङ्घले सहयोग गर्छ', प्रवक्ता क्षेत्रीले भने, 'जस्तोसुकै अप्ठ्यारो पर्दा सङ्घमा खबर गर्नुस् भनेका छौं।'

- रासस