बागलुङ-पर्वत जोड्ने ५६७ मिटर लामो झोलुङ्गे पुलको नाम ‘गोल्डेन ब्रिज’

बागलुङ- विश्वकै लामो दाबी गरिएको बागलुङ-पर्वत जोड्ने झोलुङ्गे पुललाई ‘गण्डकी गोल्डेन ब्रिज’ नामकरण गरिएको छ। बागलुङ नगर कार्यापालिकाको बैठकले सार्वजनिक अपिलमार्फत् प्राप्त उत्कृष्ट १० मध्ये 'गण्डकी गोल्डेन ब्रिज’ नाम छनोट गरेको हो। 

नगरपालिकामा प्राप्त नाममध्ये बागलुङ नगरपालिका–५ मालिका निवासी घनश्याम सापकोटाले तयार गरेको ‘गण्डकी गोल्डेन ब्रिज’ नामकरण गर्ने निर्णय भएको नगरप्रमुख जनकराज पौडेलले जानकारी दिए। मंगलबार सम्पन्न कार्यपालिका बैठकले उक्त नाम राख्ने निर्णय गरेको थियो।

पहिलो चरणमा नगरपालिकाले उत्कृष्ट दश नाम छनोट भएका थिए। पुलको नाम तयार गर्ने व्यक्तिलाई नगरपालिकाले २५ हजार रुपैयाँ नगद राशी उपलब्ध गराउने घोषण गरेको थियो।

बागलुङ नगरपालिका–१ रामरेखादेखि पर्वतको कुस्मा नगरपालिका–१ अदुवाबारी जोड्ने कालिगण्डकी नदीमाथि हालै निर्माण गरिएको ५६७ मिटर लामो पुल नगरपालिकाले विश्वकै लामो दाबी गर्दै गिनिज बुकमा दर्ता गराउन निवेदन दिएको छ। पुलले एकसाथ ८५ मेट्रिक टन लोड धान्न सक्छ। -न्युजकारखानाबाट