तालिबानद्वारा नयाँ अफगान सरकार घोषणा, कसले-के जिम्मेवारी पाए?

काबुल- अफगानिस्तानको सत्ता कब्जा गरेको तालिबान समूहले नयाँ सरकारको घोषणा गरेको छ। तालिबानले विभिन्‍न मन्त्रीहरुको नाम पनि घोषणा गरेको छ। 

मोहम्मद हसन अखुन्दको नेतृत्वमा कामचलाउ सरकारका मन्त्रीहरुको नाम घोषणा गरेको अलजजिराले जनाएको छ। अब्दुल घानी बरादर कार्यकारी नेता रहनेछन् भने सिर्जाउद्दीन हक्कानी गृहमन्त्री बनेको मुख्य प्रवक्ता जाबिहुल्लाह मुजाहितले मंगलबारको पत्रकार सम्मेलनमार्फत जानकारी गराएका छन्। 

सिर्जाउद्दीन ह्ककानी नेटवर्कका संस्थापक नेताका छोरा हुन्। मुल्लाह ओमारका छोरका मुल्लाह मोहम्मद याकूबलाई रक्षा मन्त्रालयको जिम्मेवारी दिइएको छ। त्यसैगरि वित्त मन्त्रालयको जिम्मेवारी हेदायातुल्लाह बाद्रीलाई दिइएको छ। 

तालिबान सरकारका मन्त्री बनेकाहरु अधिकांश पश्‍तुन क्षेत्रका रहेको काबुलबाट अलजजिराका संवाददाता चार्ल्स स्ट्राटफोर्डले जनाएका छन्। लामो समयसम्म पनि पञ्‍जशीरमा प्रवेश गर्न नसकेको तालिबानले आगामी दिनमा पञ्‍शीरको पनि प्रतिनिधित्व गराउने जनाएको छ। 

तालिबानले यसलाई कामचलाउ सरकारको संज्ञा दिएको छ। मन्त्रिमण्डलमा मुलुकमा अन्य क्षेत्रका व्यक्तिहरुको पनि प्रतिनिधित्व गराउने जनाएको छ। 

तालिबान समूहले अमेरिकी सेना फिर्ता भएलगत्तै घोषणा गर्ने अपेक्षा गरिए पनि सेप्टेम्बर पहिलो साता घोषणा गरेको हो। अगस्त ३१ मा अमेरिकी सेना पूर्णरुपमा स्वदेश फिर्ता भइसकेको छ। 

तालिबानले पूर्णरुपमा समावेशी सरकार बनाउने प्रतिबद्धता व्यक्त गर्दै मुलुकभरका सबै जातजातीलाई समेट्‍ने प्रयास गर्नेसमेत जनाएको छ।