विश्व ११ विरुद्ध खेल्दै सन्दीप

काठमाडौं - सन्दीप लामिछानेले विश्व ११ विरुद्ध खेल्ने भएका छन्। बंगलादेश क्रिकेट बोर्डको आयोजनामा हुने विश्व ११ विरुद्ध एसिया ११ मा नेपाली स्पिनर सन्दीप लामिछानेले एसिया ११ बाट खेल्ने भएका हुन्।

बंगलादेश क्रिकेट बोर्डले मंगलबार एसिया-११ का १४ सदस्यीय खेलाडीको घोषणा गरेको हो। एसियाली देशका खेलाडी समावेश गरिएको एसिया ११ मा सन्दीपसहित भारतका कप्तान विराट कोहली, केएल राहुल, शिखर धवन, रिशभ पन्त, मोहम्मद सामी, कुलदिप यादवलगायत छन्। यस्तै तमिम इक्वाल, लिन्टन दाश, मुस्फिजुर रहिम, थिसारा पेरेरा, रासिद खान, मुस्ताफिजुर रहमान, लसिथ मालिंगा, मुजिब उर रहमान रहेका छन्।

यस्तै फाप डुप्लेसिसले कप्तानी गर्ने विश्व-११ को टिमका अन्य सदस्यमा क्रिस गेल, एलेक्स हेल्स, निकोलस पुरन, रोस टेलर, जोनी बेयरस्टो, केइरन पोलार्ड, आदील राशिद, शेल्डन कट्रेल, लुंगी नेग्दी, एण्ड्रिउ टाइ र मिचेल मेक्लेनेघन रहेका छन्।

खेल मार्च १८ र २१ मा ढाकामा हुनेछ।