प्रदेशस्तरीय खुला भलिबल : नेकपा बाब्लालाई पराजित गर्दै एन्जिला तेस्रो

अछाम– साँफेबगरमा जारी प्रथम प्रदेशस्तरीय खुला पुरुष भलिबल प्रतियोगितामा एन्जिला पुस्तक पसल टिम तेस्रो भएको छ।

एन्जिला नेकपा गाउँ कमिटी बाब्लालाई ३–२ को सेटमा पराजित गर्दै तेस्रो भएको हो।

जितसँगै एन्जिलाले नगद १ लाख ५० हजार रूपैयाँ पुरस्कार जितेको छ।

पहिलो सेट २५–२० ले जितेको एन्जिलाले त्यसपछिका लगातार दुई सेटको नतिजा विपक्षीलाई सुम्पियो। बाब्लाले दोस्रो र तेस्रो सेट क्रमशः २५–१६ र २५–२३ले आफ्नो पक्षमा पार्याे।

त्यसपछि खेलमा फर्किएको एन्जिलाले चौथो सेट २५–१६ र पाँचौं सेट १५–१३ ले जित्यो।

प्रतियोगितामा एन्जिलाका सुवास महतो म्यान अफ द म्याच घोषित भए।

प्रतियोगिताको उपाधिका लागि आयोजक गिरिजाप्रसाद कोइराला फाउन्डेसन, अछाम र प्रमुख प्रशासकीय अधिकृतको टिम आजै प्रतिस्पर्धा गर्दैछन्।

प्रतियोगिताको विजेता टिमले नगद ५ लाख र उपविजेताले दुई लाख ५० हजार रूपैयाँसहित ट्रफी हात पार्नेछ।

पर्यटन वर्ष २०२० लाई लक्षित गर्दै प्रतियोगिता आयोजना गरिएको फाउन्डेसनका सचिव कृष्ण कँवरले जानकारी दिए।