दिदीबहिनी कप भलिबलको उपाधि एपीएफलाई

काठमाडौं– विभागीय डर्बीमा एपीएफले नेपाल पुलिसलाई हराउँदै चौथो संस्करणको दिदीबहिनी कप राष्ट्रिय भलिबल प्रतियोगिताको उपाधि जितेको छ।

पर्वतको बेनीमा शनिबार सम्पन्न खेलमा एपीएफले नेपाल पुलिस क्लबलाई ३–१को सेटमा हराउँदै उपाधि जितेको हो। खेलको पहिलो सेटमा साविक विजेता एपीएफमाथि हाबी भएको प्रहरीले त्यसपछिका लगातार तीन सेटमा हारको सामना गर्‍यो।

एपीएफले पुलिसमाथि १५–२५, २५–१८, २५–२१ र २५–१२ को नतिजा निकाल्यो।

उपाधि विजेता एपीएफले दुई लाख र उपविजेता पुलिस क्लबले एक लाख रूपैयाँ पुरस्कार पाएको छ।

न्यु डायमण्ड तेस्रो

प्रतियोगिताको अघिल्लो खेलबाट दिदीबहिनी कपको तेस्रो स्थानका लागि प्रतिस्पर्धा गरेको न्यु डाइमण्ड स्पोर्टस क्लब तेस्रो भएको छ।

उसले विभागीय टिम आर्मीलाई ३–० को सोझो सेटमा पराजित गर्दै तेस्रो स्थान हासिल गरेको हो।

जितका लागि न्यु डाइमण्डले आर्मीलाई २५–२३, २५–२१ र २५–२२ को सेटमा हराएको थियो। न्यु डाइमण्डले ५० हजार पुरस्कार जितेको छ।

साविकको उपविजेता न्यु डाइमण्ड क्लबले सेमीफाइनको खेल हारेपछि उसले तेस्रो स्थानमा चित्त बुझाउनु परेको हो।