खप्तड गोल्डकप फुटबल आजबाट

धनगढी– ‘नेपाल आइस सुदूरपश्चिम अन्तर्राष्ट्रिय आमन्त्रण खप्तड गोल्डकप फुटबल प्रतियोगिता २०७६’ आज (शुक्रबार) सुरु हुँदैछ।

धनगढीस्थित रंगशालामा सुरु हुने प्रतियोगिताको उद्घाटन खेलमा सिराहाको बाग्मती क्लब र भारतकाे कञ्चनजंगा फुटबल क्लबबीच प्रतिस्पर्धा हुँदैछ।

आयोजक सुदूरपश्चिम–११ स्पोर्टस क्लबले बिहीबार पत्रकार सम्मेलन गर्दै प्रतियोगिताको सम्पूर्ण तयारी पूरा भएको जनाएको छ।

सुदूरपश्चिम प्रदेशमा हुने एकमात्रै गोल्डकप प्रतियोगिताको बिजेतालाई २१ लाख एक तथा उपविजेतालाई १० लाख एक रूपैयाँसहित ट्रफी, मेडल तथा प्रमाणपत्र प्रदान गरिने जनाइएको छ।

यस्तै, प्रतियोगिताको उत्कृष्ट खेलाडीलाई मोटरसाइकल, विभिन्न विधाका उत्कृष्ट खेलाडीलाई जनही १५ हजार र प्रत्येक खेलको म्यान अफ दि म्याचलाई जनही १० हजार रूपैयाँ पुरस्कार प्रदान गरिने छ।

प्रतियोगिता आयोजनामा एक करोड ५० लाख रूपैयाँ खर्च हुने अनुमान गरिएको छ।

‘सुदूरपश्चिम प्रदेशको पहिचान, फुटबल विकासको अभियान’ भन्ने नारासहित क्लबले चार वर्षयता प्रतियोगिता सञ्चालन गरिरहेको छ।