संखुवासभा हत्या घटना : धरानबाट घटनास्थल प्रस्थान गर्‍यो कुकुरसहितको टोली

विराटनगर- संखुवासभाको मादी नगरपालिका-१ मा एकै परिवारका ६ जनाको हत्या घटना शंकास्पद देखिएको भन्दै प्रहरीले कुकुरसहितको टोली पठाएको छ। संघीय प्रहरी इकाई धरानबाट एसपी भीम दाहालको नेतृत्वमा कुकुरसहितको टोली खटिएको प्रदेश १ प्रहरी कार्यालय विराटनगरका प्रवक्ता एसपी नवीनराज राईले जानकारी दिए।

'घटना शंकास्पद छ,' उनले भने, 'घटनाको अनुसन्धान गर्न एसपी साप्'को नेतृत्वमा तालिमप्राप्त कुकुरसहितको टोली घटनास्थलतर्फ गएको छ।' घटनास्थल पुगेको प्रहरीको टोलीले शवको प्रकृति हेर्दा शंकास्पद देखिएको बताएपछि कुकुरसहितको टोली परिचालन गरिएको राईले बताए।

घटनास्थलमा इलाका प्रहरी कार्यालय चैनपुरबाट प्रहरी निरीक्षकको टोली घटनास्थल पुगेर शव फेला परेको स्थानलाई घेरर राखेको मादी नगरपालिकाका प्रमुख विदुरकुमार लिङ्थेपले बताए। 'शव घोप्टो परेको अवस्थामा छ, प्रहरीले शव वरपर घेरेर मात्रै राखेको छ। थप केही भएको छैन,' उनले भने। प्रहरीले कुकुरसहितको टोलीलाई पर्खेर बसेको नगर प्रमुख लिङ्थेपले बताए। 

घटनास्थलमा ८४ वर्षीया पार्वती कार्की, ५२ वर्षीय तेजबहादुर कार्की, ५२ वर्षीया कमला कार्की, ३२ वर्षीया रञ्जना कार्की, ११ वर्षीय दिपेन कार्की र ७ वर्षीया गोमा कार्कीको शव रहेको प्रहरीले जनाएको छ।