‘ए’ डिभिजन लिगमा हिमालयन शेर्पा र जावलाखेलको बराबरी

काठमाडौं– हिमालयन शेर्पा क्लब र जावलाखेल युथ क्लबले बराबरी खेलेसँगै सहिद स्मारक ए डिभिजन लिगको १२ औं चरणका सबै खेल सकिएका छन्। सातदोबाटोस्थित एन्फा कम्प्लेक्समा सम्पन्न खेलमा हिमालयन शेर्पा र जावलाखेल युथ क्लब ३–३को बराबरीमा रोकिए।

हिमालयन शेर्पाका लागि पाँचौं मिनेटमै स्टेफेन सामिरले गोल गरेर सुरुवाती अग्रता दिलाएका थिए। त्यस्तै, २६ औंं मिनेटमा विजय श्रेष्ठले गोल गर्दै शेर्पाको अग्रतालाई दोब्बर बनाए।

३५ औं मिनेटमा जावलाखेलका अरुण ब्लोनले रातो कार्ड पाएपछि क्लब दश खेलाडीमा समेटिएको थियो। टोलीविरुद्ध शेर्पाका विदेशी खेलाडी स्टेफेनले पहिलो हाफको इन्ज्युरी समयमा गोल गर्दा शेर्पाले पहिलो हाफमा तीन गोल बनाएको थियो।

पहिलो हाफको इन्ज्युरी समयमा जावलाखेलका कुवेर विष्टले पनि गोल गरे। शेर्पाको ३ र जावलाखेलको एक गोलसहित पहिलो हाफ सकिएको थियो।

खेलको ६० र ६९ औं मिनेटमा जावलाखेलले गोल गरेर जतिजालाई बराबरीमा ल्यायो। फोडे फोफ्फान र रुप बहादुर लामाले गोल गरेर टिमलाई बराबरीको स्थानसम्म ल्याएका थिए।

६८ औं मिनेटमा शेर्पाका निरज बस्नेतले रातो कार्ड पाए। उनले रातो कार्ड पाएसँगै दुवै टोली १० खेलाडीमा सीमित भएका थिए। यो बराबरीसँगै दुवै क्लबको अंक तालिकामा एक, एक अंक थपिएको छ। अंक बढे पनि दुवै टोलीको स्थानमा भने परिवर्तन भएको छैन।

हिमालयन शर्पा क्लब ११ अंकका साथ तालिकाको ११ औं स्थानमा छ भने जावलाखेल युथ क्लब १९ अंकका साथ पाँचौ स्थानमा छ।