साँफेबगरमा सुपकै ठूलो धनराशीको भलिबल प्रतियोगिता हुने

अछाम - अछामको साँफेबगरमा सुदूरपश्चिम (सुप) प्रदेशकै ठूलो धनराशीको भलिबल प्रतियोगिता हुने भएको छ। जिपी कोईराला प्रतिष्ठान जिल्ला शाखा अछामको आयोजनामा प्रदेश स्तरीय खुल्ला पुरुष भलिबल प्रतियोगिता हुन लागेको हो।

पूर्वप्रधानमन्त्री एवम् नेपाली कांग्रेसका सभापति गिरिजा प्रसाद कोईरालाको स्मृतीमा प्रजातन्त्र दिवसको अवसर पारी भलिबल प्रतियोगिताको आयोजना गरिएको जिपी कोईराला प्रतिष्ठान अछामका अध्यक्ष यज्ञराज ढुंगानाले जानकारी दिए। पुरस्कार राशी प्रदेशकै हालसम्मको ठूलो हुने र त्यसबारे फागुन ३ गतेको पत्रकार सम्मेलनमार्फत सार्वजनिक गरिने ढुंगानाले बताए।

प्रतियोगतामा सुदूरपश्चिम प्रदेशका बिभिन्न जिल्ला, पालिका, संघसंस्था, कर्मचारी तथा व्यक्तिगत रुपमा टिम दर्ता गर्न पाइने आयोजकले जनाएको छ।

प्रत्येक टिमबाट १४ जना खेलाडी सहभागी गराइने उक्त प्रतियोगितामा एक टिमले बढीमा तीन जनासम्म अन्य प्रदेशका खेलाडी पनि सहभागी गराउन पाउने प्रतिष्ठानका सचिव कृष्ण कुवँरले जानकारी दिए। विभागीय क्लबबाट नेपालको प्रतिनिधित्व गरी अन्तर्राष्ट्रिय स्तरको प्रतियोगितामा सहभागी खेलाडी सुदूरपश्चिमको भएतापनि बाह्य तीन जनामा गनिने सचिव कुवँरले बताए।

फागुन ७ गते प्रजातन्त्र दिवसको दिनबाट सुरु हुने प्रतियोगिताले भ्रमण वर्ष २०२० लाईसमेत टेवा पुग्ने विश्वास आयोजकले लिएको छ।