पुलिसमाथि मनाङको सहज जित

काठमाडौं - शहीद स्मारक ए डिभिजन लिग अन्तर्गत मंगलबारको खेलमा मनाङ मर्स्याङ्दी क्लब विजयी भएको छ। सातदोबाटोस्थित एन्फा कम्प्लेक्समा भएको खेलमा मनाङले विभागीय टोली नेपाल पुलिस क्लबलाई २-० ले पराजित गरेको हो।

खेलको ३२ औं मिनेटमा विमल रानाको गोलमार्फत मनाङले अग्रता बनाएको थियो। त्यसको नौं मिनेट पछि नै अन्जन विष्टले गोल गर्दै मनाङको अग्रता दोब्बर बनाए।

पहिलो हाफमा २-० को अग्रता बनाएको मनाङले दोस्रो हाफमा थप गोल गर्न सकेन भने पुलिसले पनि गोल फर्काउन नसक्दा पहिलो हाफको नतिजा नै अन्तिम बन्न पुग्यो।

पुलिसका विशाल बस्नेतले मनाङका विमल रानालाई फल गरेपछि रातो कार्ड पाएका थिए।

विभागीय टोली पुलिस क्लब १७ अंकका साथ अंक तालिकाको छैटौं स्थानमा छ। उता, मनाङले आफ्नो खातामा ३ अंक थप्दै २५ अंक पुर्‍याएको छ। मनाङले ७ खेलमा जित र चार बराबरी खेल्दै २५ अंक पुर्‍याएको हो। मनाङ तालिकाको तेस्रो स्थानमा छ।