अमेरिका र ओमान आज भिड्दै

काठमाडौं– ‘विश्वकप क्रिकेट लिग २’ अन्तर्गतको त्रिकोणात्मक शृंखलामा आज (मंगलबार) संयुक्त राज्य अमेरिकाले आज ओमानको सामना गर्दैछ।

कीर्तिपुरको त्रिवि क्रिकेट मैदानमा साढे ९ बजे सुरु हुने खेलमा अमेरिका र ओमान शृंखलामा दोस्रो पटक भिड्न लागेका हुन्।

पहिलो खेलमा ओमानसँग हारेको अमेरिका आजको खेलमा जित निकाल्दै शीर्ष स्थानमा उक्लने दाउमा हुने छ।

अमेरिका पहिलो खेलमा ओमानसँग ६ विकेटले पराजित भएको थियो।

यता तुलनात्मकरूपमा बलियो देखिएको ओमान पनि अमेरिकालाई हराउँदै शीर्षस्थानको अंकदूरी बढाउने रणनीतिमा छ।

नेपाल भ्रमणअघि लिगको अंकतालिकाको ८ अंकसहित तेस्रो स्थानमा रहेको ओमान जारी त्रिकोणात्मक शृंखलाका तीन खेलमा जित निकालेर शीर्ष स्थानमा उक्लिएको हो। शृंखलामा ओमानले दुई खेलमा नेपाललाई र एक खेलमा अमेरिकालाई पराजित गरेको हो।

लिगको अंकतालिकामा ओमान १४ अंकसहित शीर्ष स्थानमा छ। उसले जारी लिगका ९ खेलमध्ये ७ मा जित निकाल्दा २ मा मात्रै हारको सामना गरेको छ।

यता, नेपाल भ्रमणअघि १२ अंकसहित शीर्ष स्थानमा रहेको अमेरिका दोस्रो स्थानमा झरेको छ। शृंखलाअन्तर्गत अमेरिका यसअघिका दुई खेलमा पराजित भएको थियो।

अमेरिकाले लिगका १० खेलमध्ये ६ मा जित र ४ मा पराजय व्यहोरेको छ।

आजको खेलमा ओमानले जित निकालेमा उसको खातामा १६ अंक हुने छ। यस्तै, अमेरिकाले खेल जितेमा उसको ओमानसँग बराबर अंक हुनेछ । र, रनरेटका आधारमा शीर्ष स्थानमा उक्लनेछ।