अफगानिस्तानमा तालिबानद्वारा महिला प्रहरीको हत्या

काबुल- तालिबान लडाकूले अफगानिस्तानमा एक महिला प्रहरीलाई गोली हानी हत्या गरेका छन्। अफगानिस्तानको घोर प्रान्तको राजधानी फिरोजखोमा घर नजिकै आफन्तकै अगाडि उनको गोली हानी हत्या गरिएको बीबीसीले जनाएको छ।

स्थानीय सञ्‍चारमाध्यमहरुका अनुसार बानु नेगार नाम गरेकी ती महिला प्रहरीको हत्या गरिएको हो। अफगानिस्तानमा महिला अधिकारको विषयमा बोल्नेहरुलाई दमन गरिरहेको भन्‍ने समाचारहरु आइरहेको समयमा उनको हत्या गरिएको हो।

बीबीसीले तालिबानलाई यस विषयमा प्रतिक्रिया माग गरेको भए पनि कुनै प्रतिक्रिया दिएको छैन। परिवारका सदस्यहरुका अनुसार उक्त घटनाको अनुसन्धान गर्ने स्थानीय तालिबानी नेताले प्रतिबद्धता जनाएका छन्।

घटनाको विस्तृत विवरण अझै आउन सकेको छैन। स्थानीय एक जेलमा कार्यरत नी महिला प्रहरी आठ महिनाकी गर्भवती रहेको पनि परिवारका सदस्यहरुले जनाएका छन्।

उक्त प्रान्तमा १३ अगस्तमा नियन्त्रण कायम गरेको तालिबानले आफूहरु महिला अधिकारहरुको सम्मान गर्ने प्रतिबद्धता व्यक्त गरेका थिए। तर, महिलाहरुमाथि क्रूर व्यवहारहरुलाई भने निरन्तरता दिइएको छ।

महिलाहरुका लागि अब विद्यालयहरुमा छुट्टै कक्षाहरु बनाइनु परने भएका छन्। त्यसैगरि महिलाहरुले मुस्लिम पोशाक पूर्णरुपमा लगाउनुपर्ने भएको छ।  

शनिबार काबुलमा महिला अधिकारका लागि प्रदर्शन गरिरहेका दर्जनौं महिलाहरुलाई तालिबानी अधिकारीहरुले तितरवितर पारेको थियो। उनीहरुलाई तालिबानका अधिकारीहरुले अश्रु ग्यास र खुर्सानीको धुलो छर्केर तितरवितर पारेको बीबीसीले जनाएको छ।