उपनिर्वाचनका लागि मतदाता नामावली अद्यावधिक असोज १ देखि

काठमाडौं - निर्वाचन आयोगले उपनिर्वाचनका लागि असोज १ देखि मतदाता नामावली अद्यावधिक गर्ने भएको छ। प्रतिनिधिसभा, प्रदेशसभा र स्थानीय तहमा रिक्त रहेका स्थानमा आगामी मंसिर १४ गते उपनिर्वाचन हुँदैछ।

आयोगका प्रवक्ता शंकरप्रसाद खरेलका अनुसार अन्तिम मतदाता नामावली प्रकाशन गर्नका लागि नामावली अद्यावधिक गर्न पाँच दिनको समय तोकिएको छ। यस अवधिमा नामावलीमा केही सच्याउन, दोहोरो भए हटाउन, विवादित भए उजुरी गर्नका लागि निवेदन दिन सक्ने आयोगले जनाएको छ। मतदाता नामावली अध्यावधिक कार्य सम्बन्धित वडामै हुनेछ। उजुरीमाथि छानबिन गरेर आयोगले अन्तिम नामावली प्रकाशन गर्नेछ। उपनिर्वाचन हुने स्थानमा हाल चार लाख ४७ हजार मतदाता छन्। 

आयोगको पछिल्लो तथ्यांक अनुसार हाल प्रतिनिधिसभा सदस्य एक, प्रदेशसभा सदस्य तीन, नगरपालिका प्रमुख एक, गाउँपालिका अध्यक्ष तीन, उपाध्यक्ष एक र वडा अध्यक्ष ४२ गरी कुल ५१ पद रिक्त छ। उपनिर्वाचन ३६ जिल्लामा हुनेछ। आयोगले उपनिर्वाचनमा सहभागी हुने राजनीतिक दललाई आयोगमा दर्ता हुन भदौ मसान्तसम्मका लागि आह्वान गरेको छ।