टी-२० वरियतामा पारस गेल र धोनी भन्दा अगाडी

काठमाडौं- अन्तर्राष्ट्रिय क्रिकेट परिषद (आइसिसी)ले सार्वजनिक गरेको नयाँ टी-२० वरियताको अलराउण्डरतर्फ कप्तान पारस खड्काले वेष्ट इन्डिजका आन्द्रे रसेल, क्रिस गेल, भारतका सुरेश रैना, रोहित शर्मा, अफगानिस्तानका राशिद खान र इंग्ल्याण्डका बेन स्टोक्सलाई पछि पारेका छन्। 

कप्तान खड्का ९० रेटिङ सहित वरियताको २७ औं स्थानमा हरेका छन्। कप्तान पारसको सर्वाधिक उच्च वरियता भने २५ रहेको छ । ब्याटिङतर्फ कप्तान पारस ४१७ रेटिङ अंक सहित ६८ औं स्थानमा रहेका छन्। उनले भारतका महेन्द्र सिंह धोनी र वेष्ट इण्डिजका क्रिस गेललाई पछि पारेका छन्। 

त्यस्तै नयाँ वरियतामा नेपालका सोमपाल कामी र बसन्त रेग्मी पनि अटाएका छन्। अलराउण्डरतर्फ ४९ रेटिङ अंक पाएका सोमपाल ६७ औं स्थानमा यथावत रहेका छन् । त्यस्तै बलिङको वरियतामा सोमपाल ४११ रेटिङ अंक सहित ७८ औं स्थानमा यथावत छन्। बलिङतर्फ मात्र अटाएका बसन्त एक स्थान तल झर्दै ७२ औं स्थानमा रहेका छन्।