नेयमारको गोलमा ब्राजिलले बराबरी खेल्यो

एजेन्सी- स्टार स्ट्राइकर नेयमारले गोल गरेपछि अन्तराष्ट्रिय मैत्रीपूर्ण खेलमा ब्राजिलले कोलम्बियासँग बराबरी खेलेको छ । शनिबार बिहान भएको मैत्रीपूर्ण खेलमा ब्राजिलले कोलम्बियासँग २-२ गोलको बराबरी खेलेको हो।

२-१ ले पछि परेको अवस्थामा नेयमारले गोल गर्दै खेल बराबरीमा ल्याए। खेलको १९ औं मिनेटमा कासिमिरोले गोल गर्दै ब्राजिललाई अग्रता दिलाएका थिए। तर, ब्राजिलको अग्रता धेरै समय टिक्न सकेन्। 

ब्राजिलले गोल गरेको छ मिनेट नबित्दै कोलम्बियाका लुइस मुरिएलले गोल गर्दै खेललाई १-१ को बराबरीमा ल्याए। खेलको ३५ औं मिनेटमा मुरिएलले व्यक्तिगत दोस्रो गोल गर्दै कोलम्बियालाई पहिलो हाफमा २-१ को अग्रता दिलाए । 

त्यसपछि खेलको ५८ औं मिनेटमा नेयमारले गोल गर्दै खेल २-२ को बराबरीमा ल्याए। लामो समय चौटका कारण मैदान बाहिर रहेका नेयमार यसै खेलबाट खेलमा फर्किएका छन्।