जुडीफाँट-चिसापानी खण्डमा अवरुद्ध

तनहुँ- अविरल वर्षासँगै ठाउँ-ठाउँमा आएको पहिरोका कारण तनहुँ र स्याङजा जोड्ने शुक्लागण्डकी दुलेगौंडा ढोरबाराही मोटर मार्गको जुडीफाँट-चिसापानी सडकखण्ड अवरुद्ध भएको छ।

पहिरोले सडक अवरुद्ध भएपछि चिसापानी आसपासबाट चल्ने सवारीसाधन भानुमती उक्लेर भीमाद हुँदै गुडिरहेको हरिनास गाउँपालिका उपाध्यक्ष झनमाया पराजुलीले बताइन्। सडक अवरुद्ध हुदाँ दुई जिल्लाको जनजवीन प्रभावित बनेको छ।

गत असारमा पनि पहिरो खसेको थियो। एक हप्तापछि पहिरो हटाएर सडकमा सवारी चल्न थालेका थिए। तर, फेरि पहिरो खसेको हो।

तनहुँको शुक्लागण्डकी नगरपालिका-१० जुडीफाँटदेखि स्याङजाको हरिनास गाउँपालिकाको केन्द्र चित्रेभञ्याङ जोड्ने यो सडक कालोपत्रेको काम भइरहेको छ। 

प्रदेश सरकारको लगानीमा क्याङदी खोलमा ४० मिटर लामो मोटरेबल पुल र १६ किलोमिटर सडक कालोपत्रेको काम भइरहेको हो। ३२ करोड ६५ लाख रुपैयाँमा पुल र सडकको काम गोल्डेनगुड बानियाँ जेभीले गरेको छ।