नेयमारबारे वार्ता गर्न बार्सिलोनाको टोली पेरिसमा 

एजेन्सी- स्पेनिस ला लिगा क्लब बार्सिलोनाको टोली आफ्ना पूर्व स्टार खेलाडी नेयमारलाई फ्रान्स लिग वान क्लब पेरिस सेन्ट जर्मन (पिएसजी)बाट क्याम्प नाउमा फर्काउन पहिलो पटक पेरिस पुगेको स्पेनिस सञ्चारमाध्यमले जनाएको छ । बार्सिलोनाको टोली नेयमारका लागि ८० मिलियन यूरो र काउटिन्हो प्रस्ताव लिएर पेरिस पुगेको अन्तर्राष्ट्रिय सञ्चारमाध्यमले जनाएको हो ।  

पिएसजीसँग वार्ताका लागि पेरिस पुगेको बार्सिलोनाको एक प्रतिनिधिमण्डको टोलीले वार्तालाई तिव्रता दिएको छ । बार्सिलोनाका अध्यक्ष जोसेप मारिया बार्टोमुले नेयमारलाई आफ्नो क्लबमा भित्र्याउन कुनै कसर बाँकी नछोड्ने पक्षमा देखिन्छन् । तर, यता पिएसजी भने बार्सिलोना भन्दा रियल म्याड्रिड जानसक्ने अपेक्षा राख्दै आएको छ । 

त्यसैले बार्सिलोनाको प्रतिनिधि टोली एएफसीका प्रतिनिधिसँग भेटेर पिएसजीले नेयमार आफूलाई दिन किन अनिच्छुक देखिएको भन्नेबारे समेत बुझ्ने प्रयास गर्ने जनाएको छ । उनीहरुले फ्रान्सका पूर्व दिग्गज खेलाडी एबाइडलसँग पनि भेट्ने छन् । 

बार्सिलोना र रियल म्याड्रिड दुबै नेयमारलाई आ-आफ्नातर्फबाट ला-लिगा खेलाउन प्रतिस्पर्धा गरिरहेका छन् । तर, बार्सिलोना नेयमारलाई जसरी पनि रियल जानबाट रोक्ने पक्षमा देखिन्छ । 

बार्सिलोनाले मंगलबार पीएसजीसमक्ष औपचारिक प्रस्ताव राख्नेछ र सम्भवतः अबाइडलले कौटिन्होलाई अघि सार्दै पिएसजीले मागेको रकम कम गर्ने प्रयास गर्नेछन् । तर, पीएसजी भने नेयमारलाई नगदमै बेच्न इच्छुक देखिन्छ । 

यद्यपि, मंगलबारको बैठकले पनि अन्तिम निर्णय नहुने अन्तर्राष्ट्रिय सञ्चारमाध्यमहरुले उल्लेख गरेका छन् । अझै पनि खेलाडी ट्रान्सफरका लागि यूरोपियन विन्डोको समय बाँकी नै छ । अहिलेलाई भने नेयमार पिएसजी छोड्न चाहन्छन् र बार्सिलोना उनलाई लिन निकै इच्छुक छ ।