प्रभुराम शर्मा प्रधानसेनापतिमा नियुक्त

काठमाडौं– राष्ट्रपति विद्यादेवी भण्डारीले नेपाली सेनाको प्रधानसेनापतिमा प्रभुराम शर्मालाई नियुक्त गरेकी छन्। राष्ट्रपतिले शर्मालाई आगामी २४ गतेबाट लागू हुने गरेर प्रधानसेनापतिमा नियुक्त गरेको राष्ट्रपति कार्यालयले जनाएको छ। नेपालको संविधानको धारा २६७ को उपधारा (५) बमोजिम नेपाल सरकार, मन्त्रिपरिषद्को सिफारिसमा नेपाली सेनाको कायममुकायम प्रधान सेनापतिको कार्यभार सम्हाल्दै आएका बलाधिकृत रथी प्रभुराम शर्मालाई शुक्रबार राष्ट्रपतिले प्रधानसेनापतिमा नियुक्त गरेकी हुन्। 

प्रधानसेनापति पूर्णचन्द्र थापाले भदौ २४ गतेबाट अनिवार्य अवकाश पाउँदैछन्। उनी अवकाश पाउनु एकमहिनाअघि नै घर बिदामा बसिसकेका छन्। थापा घर बिदामा बसेपछि सरकारले शर्मालाई कामु प्रधानसेनापतिको जिम्मेवारी दिएको थियो। अब भदौ २४ गतेबाट नेपाली सेनाको प्रधानसेनापतिका रुपमा शर्माले शपथ र पदभार ग्रहण गरेर औपचारिक जिम्मेवारी सम्हाल्नेछन्।

राष्ट्र संघको पूर्वी टिमोर र कंगोमा रहेको मिसनमा खटिने नेपाली फौजको कमान्ड गरेका उनी सन् २००८ देखि २०११ सम्म ढाकामा सैनिक सहचारी थिए। 

शर्माले सन् १९८४ मा श्री पुरानो गोरख गणबाट सैनिक जीवन आरम्भ गरेका थिए। भारतबाट नेसनल डिफेन्स कोर्स गरेका उनले अमेरिकाका विभिन्न शिक्षालयबाट तालिम लिएका छन्।

नेपाल–भारतबीच वार्षिक रूपमा सञ्चालन हुने सुरक्षासम्बन्धी उच्चस्तरीय बैठकमा भाग लिएको अनुभव पनि उनमा छ। युद्ध कार्य महानिर्देशक, सम्भाररथी महानिर्देशक र बलाध्यक्षजस्ता जंगीअड्डाभित्रका महत्त्वपूर्ण जिम्मेवारी सम्हाल्दै उनी नेपाली सेनाको दोस्रो उच्च पद बलाधिकृतमा नियुक्त भएका थिए।

राष्ट्र संघको पूर्वी टिमोर र कंगोमा रहेको मिसनमा खटिने नेपाली फौजको कमान्ड गरेका उनी सन् २००८ देखि २०११ सम्म ढाकामा सैनिक सहचारी थिए। त्रिभुवन विश्वविद्यालयबाट इतिहासमा स्नातकोत्तर गरेका उनले भारतको मद्रास विश्वविद्यालयबाट प्रतिरक्षा तथा रणनीतिक शास्त्रमा एमफलिसम्म अध्ययन गरेका छन्।