बेन्जिमाको ह्याट्रिकमा रियल विजयी

एजेन्सी- स्पेनिस क्बल रियल मड्रिडले फेनरवाचीलाई पराजित गर्दै औडी कपमा तेस्रो भएको छ । बुधबार भएको खेलमा फेनरवाचीलाई ५-३ गोलले पराजित गर्दा कारिम बेन्जिमाले ह्याट्रिक गरेका थिए । 

रियलको जितका लागि कारीम बेन्जिमाले तीन, नाचो र मारियानोले एक एक गोल गरे । फेनरवाचीका लागि ग्यारी रोड्रिग्युज, लाबिल डिरार र ओजन तुफानले एक एक गोल गरे । 

खेलका सुरुवाती अग्रता भने फेनरवाचीले लिएको थियो । अग्रता जोगाउन नसक्दा फेनरवाची रियलसँग ५-३ ले पराजित हुन पुग्यो । खेलको छैटौ मिनेटमा ग्यारीले गोल गर्दै फेनरवाचीले अग्रता लिएको थियो । 

त्यसको ६ मिनेट नबित्दै बेन्जिमाले गोल गर्दै खेल बराबरीमा ल्याए । २७ औं मिनेटमा बेन्जिमाले व्यक्तिगत दोस्रो गोल गर्दै रियललाई २-१ को अग्रता दिलाए । ३४ औं मिनेटमा फेनरवाचीका लागि नबिलले गोल गर्दै खेल पुनः २-२ को बरारबीमा ल्याए । 

पहिलो हाफमा २-२ को बराबरी भएको खेलमा रियलले थप तीन गोल गर्दा फेनरवाची एक गोल मात्र गर्न सक्यो। ५३ औं मिनेटमा बेन्जिमाले गोल गर्दै ह्याट्रिक पुरा गरे । ५९ औं मिनेटमा ओजान तुफानले ३-३ को स्थितीमा ल्याए पनि ६२ औं मिनेटमा नाचो र ७९ औं मिनेटमा मारियानोले गोल गर्दै रियललाई ५-३ को जित दिलाए ।