कसरी भए सेनामा जागिरे धोनी र कोट्रेल

एजेन्सी- भारतीय क्रिकेटर महेन्द्र सिंह धोनी यतिबेला प्यारासुट रेजिमेन्टसँग बेङ्लोरस्थित हेडक्वाटरमा तालिममा छन् । विश्वकप २०१९ पछि सेनामा समय बिताउन र तालिममा सहभागी हुन उनले भारतीय क्रिकेट बोर्ड (बिसिसिआई) बाट दुई महिना बिदा लिएका हुन् । 

तालिममा रहेकै कारण पूर्व कप्तान धोनी वेस्टइन्डिज टुरमा रहेको भारतीय क्रिकेट टोलीमा सामेल छैनन् । भारतीय सेनाका अनुसार धोनीले ३१ जुलाईदेखि १५ अगस्टसम्म प्यारा बटालियनसँग कस्मिरमा पेट्रोलिङ र पोस्ट गार्ड ड्युटी गर्नेछन् । 

धोनीको देशभक्ति देखेर वेस्टइन्डिजका तीव्र गतिका बलर सोल्डन कोट्रेलले प्रशंसा गरेका छन् । कोट्रेल पनि जमाइकाका डिफेन्स फोर्सका सिपाही हुन् । धोनीलाई क्रिकेटमा उनको उपलब्धिका कारण २०११ मा प्रादेशिक सेनामा मानार्थ लेफ्टिनेन्ट कर्नेलको पद दिएको थियो । 

उनी भारतीय सेनाबाट यो सम्मान पाउने दोस्रा खेलाडी हुन् । यसअघि पूर्व कप्तान कपिल देवले भारतीय सेनाबाट उक्त सम्मान पाएका थिए । २०११ मा प्रादेशिक सेनाले मानार्थ लेफ्टिनेन्ट कर्नेलको सम्मान दिँदा धोनीले आफू सेनामा आधिकारी बन्न चाहेको तर, भाग्यले क्रिकेटर बनाएको उनले बताएका थिए । 

धोनीले अगस्ट २०१५ मै प्यारासुटर बनिसकेका थिए । आग्राको प्यारासुट ट्रेनिङ स्कुल (पिटिएस) मा भारतीय वायु सेनाको एएन-३२ विमानबाट पाँचौ छलाङ पूरा गर्दै उनले प्रतिष्ठित प्यारा विंग्स प्रतीक चिह्न लगएका थिए । 

त्यतिबेला धोनीले १ हजार २५० फिट उचाइबाट छलाङ लगाएका थिए । जहाँ उनी एक मिनेट भन्दा पनि कम समयै सफलतापूर्वक अवतरण गरेका थिए ।

कोट्रेल पनि सेना

क्रिकेट मैदानमा कोट्रेललाई सेनाजस्तै देखिन्छ । जव उनी तीव्र गतिमा बलिङ गर्दै विकेट लिन्छन् तब उनको सेलिब्रेसन नै सेनाको सेल्युट हुन्छ । उनले आफ्नो सेलिब्रेसनका बारेमा बताउँदै भनेका थिए, ‘म पेसामा फौजी हुन् ।’ 

२९ वर्षीय कोट्रेलले वेस्टइन्डिजका लागि सन् २०१५ बाट डेब्यु गरेका थिए । कोट्रेलले भने, ‘जब मलाई विकेट मिल्छ तब म सलामी दिन्छु । मैले आर्मीको ट्रेनिङ गर्ने क्रममा ६ महिना मार्चपास र सलामीको अभ्यास गरेको थिए ।’